951/2024-2025

Dated Siaha 25th June 2024 : Mara Autonomous District Council (MADC) hnuaia 07- Chakhei MDC Constituency By- Election neih tura inbuatsaihna kal zelah nimin leh vawiin khan Pu V.L. Hruaizela Khiangte, District Election Officer (DEO), Pu K.L. Vulmawia, Superintendent of Police (SP) leh Pu Ngurthansanga, SDO (S) te chuan Chakhei MDC biala polling station awmte tlawhna an nei.

Pu V.L. Hruaizela Khiangte chuan inthlanna felfai leh thianghlim tak awm turin mawhphurhna nei zawng zawngten theihtawp an chhuah mek a ni a ti a. Mipuiten zalen taka vote an thlak theih nan polling station - te dinhmun endik chu thil tul tak a nih avangin a hmun ngeia kalchilha endik a nih thu a sawi . Boruak muanawm tak hnuaia inthlanna nei turin Block Level Officer ( BLO) leh NGO ten theihtawp min chhuahpui a ngai a ti a. A bik takin BLO- te chu offical an nih angin an mawhphurhna a sang hle tiin tha taka an mawhphurhna hlen turin a chah.

Pu V. L. Hruaizela Khiangte chuan Autonomous District Council (ADC) hnuaiah inthlan a zing bik hle tiin, MLA leh MP (LS) election neih a ni tawh a, tunah MDC leh Village Council (VC) by- election nei leh turin inpuahchah leh mek a ni a ; election official-te kutah engkim dah theih a ni lo tiin, NGO leh MPF bakah mipuite thawhpuina tha a tul hle a, theihtawp min chhuahpui rawh u tiin a sawm a. NGO te chu khawtlang mipuite innghahna ber an nih angin mipuite mit tlung taka awm a pawimawh hle tih sawiin, thleihbik nei lo tur leh party awn lam nei lo turin a chah a ni. State Election Commission (SEC) in by-election atana candidate-te sum senso a phal chin chu cheng nuai hnih a ni tih tarlangin Pu V.L. Hruaizela Khiangte chuan sum lengvak leh senso te uluk taka venpui turin NGO leh MPF- te a ngen nghal a ni.

India ram chu khawvela democracy ram lian leh ropui ber a ni tih sawiin DEO chuan democracy ramah chuan mipuiten an aiawha roreltu tur an thlan chhuah chu thil pawimawh hmasa a ni, a ti a. Mipuiten zalen leh boruak ralmuang tak hnuaia an aiawha roreltu tur an thlanchhuah ngei theih nan thawhpuiah NGO pathum - MTP, MCHP leh MSO te a sawm a, mipuiten an duhzawng tak an thlanchhuah theih nan duhsakna a hlan nghal bawk.

Pu K.L. Vulmawia, Superintendent of Police chuan inthlan felfai tak nei turin thawhhona tha a tul hle a ti a. Model Code of Conduct ( MCC) kalpui mek a ni a, tha taka zawm tlan a pawimawh hle a ti. Mipuiten zalen taka vote an thlak theihna turin venhimna kawngah theihtawp chhuah mek zel a ni tiin, zalen leh ralmuang takin mipuiten vote an thlak ngei a beisei thu a sawi a. Dan leh thupek kenkawh kawngah Police- te kutah engkim dah vek theih a ni lo a, NGO leh mipuite tawiawmna a pawimawh hle tiin tha taka tawiawm tura sawmin inthlanna neih turah party leh mipuite duhsakna a hlan nghal.

Pu V.L. Hruaizela Khiangte (DEO), Pu K.L. Vulmawia (SP) leh Pu Ngurthansanga SDO(S) te hian 07 - Chakhei MDC Constituency hnuaia polling station pali- Chheihlu, Chakhei,Chakheitlah leh Siasi te an tlawh a. Polling Station tinah hian BLO ten lo hmuak zelin an dinhmun tlangpui leh mamawh ang angte an lo hrilh a ni. Chheihlu polling station ( Govt. Primary School -I)-ah hian vote nei mi 418 an awm a, Chakhei ( Govt. Upper Primary School) ah mi 949 awmin, Chakheitlah ( Govt. Upper Primary School) ah mi 239 awm bawkin Siasi ( Govt. Middle School ) ah hian vote nei mi 275 an awm a ni.

07- Chakhei MDC bial hi a bialtu, Pu K. Hrahmo chuan Mizoram State Legislative Assembly (MLA) inthlanpui, 2023-ah 40-Palak (ST) A/C bial aṭanga MLA-a thlan tlin a nih hnuah a chhuahsan a; bial ruak a nih tak avangin Mizoram State Election Commission chuan by-election nei turin ruahmanna a siam ta a ni.

Ruahman lawk dan chuan June ni 28, 2024 (zirtawpni) zing dar 7:00 leh tlai dar 5:00 inkarah vote thlak a ni ang a. Vote tlate hi July ni 2, 2024 (thawhlehni )-ah chhiar a ni ang.