4272/2023-2024

Dated Siaha 20th March, 2024 : Vawiin khan Siaha District Legal Services Autority buatsaihnain Industrial Training Institute (ITI) ah 'Legal Awareness Campaign' neih a ni a, Pu. Reuben T. Kompa, Principal, ITI, chuan hun a kaihruaiin Pi J. Lalnunsangi, Advocate, chu Resource person niin hun a hmanpui.

Pi J. Lalnunsangi, Advocate, chuan ‘Cyber Crime’ chungchang inzirtirna hun a hmang a. Tunlai thiamna sang zelah mitinin 'Social Media' kan hmang nasa tawh hle tiin mi tam takin Social Media an hmang sual nasa em em a, fimkhur tura tan lak a tul tawh tak zet a ti. Internet- chu thil tangkai tak ni mahse, a tangkailo zawnga hmanna a tam hle a, hei hian mipuite thinlung a hruai kawi fo a ni tiin, a tangkai zawng a internet hmang turin kalkhawmte a chah.

Thalaite zingah mahni hnathawh ngaihsak lo leh hnathawh tur pawh zawng hman lo a Social media hmang an tam tawh hle tih sawiin Pi J. Lalnunsangi chuan chhungkua leh khawtlangah chhiatna lian zawk a thlen loh nan uluk leh fimkhur zawk a social media hman a tul a ti a. Cyber Crime- ah Mizoram ngei pawh a lut thuk tawh hle tih sawiin inbumna, rukruk leh thildang thalo tam takin min chiah mek a ni, a ti a. A hmangtute hian fimkhur taka Social media leh Internet site- hrang hrangte kan hman a hun tawh tak zet tiin, fimkhur zawk leh a tangkai zawnga Social media leh Internet hmang turin kalkhawmte leh Siaha mipuite a sawm nghal a. Vawiin 'Legal Awareness Campaign' ah hian zawhna leh chhanna hun hman nghal niin, kalkhawmten an hlawkpui hle a ni.

Pu Lalrintluanga Pachuau, Instructor, ITI chuan lawmthu sawina neiin ' Legal Awareness Campaign' hun hmanna hi a khar.