No.1315/2020-2021
Kan hriat ţheuh angin, state pâwna tangkhang kan unaute an lo haw khawm a, a tam zawk an lo haw leh dawn bawk a. Mizoram hmun hrang hrangah quarantine center siamin ni 14 chhûng khung hran tur an ni a. Hetia kan inkhung hrang hi kan zavaia kan him tlan theih nan a ni a. An in lamah inkhung hrang turin ti ila, thu awih lo an awm chuan kan zavaia tan a him lo thei a ni.
Eng vangin nge a hlauhawm loh?
1. Quarantine center-a dah tur te hi an hriselna uluk taka en vek an ni a, rinhlelh kai te chu damdawi ina isolation ward-a dah nghal zel an ni a. Quarantine center-ah hi chuan insawiselna nei lote chiah an dah lut ţhin a ni.
2. Quarantine center-a khung hrante hi uluk taka ven leh enkawl an ni a, an chaw eina nawi leh bawlhhlawhte pawh a hranpaa dah khawma paih leh vek ţhin a ni.
3. Virus hi boruakah a lêng kual vel lo a, a veite khuh leh hahchhiau zawnga boruaka chil per aţanga inkai chhawn a ni ber a. Virus hi boruakah meter 1 vel thleng a lêng thei a. Chuvangin, a veite hnaih tak, metre 1 vela kan va hnaih loh chuan kan kai thei lo.
4. Quarantine center bul hnaia kan awm avangin i hlau lo ang u. A chhûngah te kan va tei luh loh a, khung hrante bul hnaia kan va kal loh chuan kan him a ni. Khung hrante hi fimkhur tura zirtir vek an ni a, face mask vuahtir vek an ni.
Khawlaia kan chhuahna: ration buhfai lâkna, gas semna, damdawi in, OPD kawt, dawr hrang hrang, chawhmeh bazar etc., velah kan fimkhur a ngai hle zawk a ni.
Heng quarantine center-a khung hrante hi ni 14 an khung hran hnu-ah, ni 14 dang anmahni ina an inkhung hran (home quarantine) leh a ngai a, thuneitute'n an vil reng ang. Khawlaia kan chhuahnaah mi dangte nen metre 1-a hlaa inhlatah tal awm tur a ni a, face mask vuah ţheuh tur a ni a, hei hi kan himna tur ber a ni.
Sawrkar thu kan awih hi kan himna tur ber a ni a, mahni duh dana kan lo chêt ve hian harsatna kan thlen a. Mipuite'n sawrkar thu an awihna apiangah hripui lêng a ziaawm a, mipuite'n sawrkar thu an awih lohna apiangah hripui a che na thung. Hei hi khawvel hmun hrang hranga thil thleng aţangin kan hmu a ni. Kan fimkhur tur a ni a, ţul lova hlauh erawh a ţangkai lo a ni.
