No.6582/2020-2021
Siaha, November 18 : Covid-19 hripui leng mek chuan ziaawm lam a la pan thei lo a, Mizoramah pawh kai thar an awm belh zel a ni. Vanduaithlak takin he hri hi Mizoram hmun thenkhatah chuan vantlangah a darh tawh niin a lang.
Kan ram dinhmun thlirin mipuite himna tur atan ruahmanna tha zawk leh inkaihruaina khauh zawk hman a tul a. Chuvangin, Shri Kesavan R, IAS, Deputy Commissioner & Chairman, Siaha District Disaster Management Authority nibawk chuan Disaster Management Act 2005, Section 33(m) leh The Mizoram Epidemic Diseases (Covid-19) (First Amendment) Regulations, 2020 (12) thineihna hmangin Siaha district mipuite kan lo him zawk nan hetiang hian thupek a chhuah :-
District dang atanga Siaha a lo thlengte chu ni 14 chhung mahni in lamah an inkhung hrang (home quarantine) ang a, VLTF ten uluk takin an vil zui ang. He thupek hi chhuah a nih atangin hman tan nghal a ni ang. He thupek hian thu leh awm zawng a huam bawk dawn a ni. He thupek bawhchhiah chu Disaster Management Act 2005, Section 51 atanga Section 60 leh IPC Section 188(45 of 1860) hmanga hrem an ni ang.
Inkaihruaina kimchang:-
1. State pawn atanga lo lutte chungchang
(i) Mizoram pawn atanga Siaha district a lo lutte reng reng chu Mizoram sawrkarin ruahmanna a siam angin quarantine tut an ni a. Mahni duhthu a Home Quarantine lo tih ve ngawt a rem lo. Lo theih loh avanga home quarantine tulte chuan Mizoram an lo luh hma ni hnih aia tlai loah VLTF recommendation kengin DC Office-ah home quarantine phalna an la tur a ni.
(ii) Mizoram pawn atanga lo lutte Aizawl/District dang atanga Siaha lo panna turin Maxi Cab/Taxi service pangngai chuan ve ngawt loh tur a ni a. Mizoram sawrkarin motor a ruahman bik (empanelled vehicle) hman tur a ni. Mahni a empanelled vehicle hmang remchang lote chuan R. Dengthuama Indoor Stadium pan mai tur a ni a. Heng mite hi contact tur a ni. Pu Ramdinpuia (9862227079) leh Pu Joseph L. Vanchhawng (7005466847).
(iii) Mizoram pawn atanga lo haw (quarantine tur) hruaina tana mahni motor hmang turte chuan motor-ah seat hma leh hnung daidanna an siam tur a ni a, quarantine turte hi driver bulah an thu tur a ni lo. Motor hi tihthianghlim (sanitize) a nih leh zet loh chuan midang phurh nan hman loh tur a ni.
(iv) Mizoram pawn atanga lo lut, quarantine paltlang lo mikhualte tumahin thlen phal a ni lo.
2. Siaha district chhunga lut turte hriat tur
(i) Siaha district chhunga lut tur leh chhuahsan a district danga zinte chuan District Control Room (03835-223045/8794401601/8974205468) ah form siam sa hmangin an in report ang. Form hi control Room-ah emaw, VLTF te hnenah emaw lam theih a ni ang. Tin, District website siaha.nic.in/ atang pawhin a download theih a ni. Report form hi Control Room ah thehluh tur a ni a, mahni ngei kalin emaw a chunga phone number tarlan ah Whatsapp kaltlangin emaw thehluh tur a ni e.
(ii) Inhriattir lawk loa lo haw/zinte chu check post-ah chawitir zel tur a ni a, an chanchin kimchang lak tur a ni. An thlen hunah Government Quarantine Facility-ah an mahni sum sengin an awm ang.
(iii) District dang atanga Siaha District-a lo zinte chu ni 14 chhung in lamah an inkhung hrang (self quarantine) ngei tur a ni. VLTF ten uluk takin an vil zui ang.
iv) District dang atanga official duty-a hun rei lo te (ni hnih-khat) cham tura lo kalte chuan an lo kal ni atanga chhut leta darkar 48 chhunga pek chhuah COVID-19 Free Certificate leh Test Report an neih chuan quarantine an ngai lovang.
v) Mahni duhthua inkhung hrangte chu ni 14 hnuah an chhuah phalsak a ni.
vi) Sumo khalhtute pawhin an mi phurte hming, khua leh biak pawh theihna (Phone Number) an la vek tur a ni a, an bulah an mi phurte an thuttir tur a ni lo. An intlawhpawh loh nan daidanna a siam tur a ni.
vii) Heng hmunahte hian check post siam a ni ang :- Kaochao East leh Tlapi. Check Post atang hian khualzinte uluk takin chhinchhiah a ni ang. Check post leh Control Room-te hian information an dawnte an inhlan chhawng zung zung ang.
viii) Hotel, Lodge leh Circuit House-te pawhin an mi khualte chanchin an chhinchhiah vek ang.
ix) Mimal lirthei khalhtute pawhin an mi phurhte an chhinchhiah vek ang a, Control Room-ah an thlen ang.
x) Bungraw chah luttute pawhin fimkhur takin an bungruate an hlang thla ang a, mi dang hnaihah an ti tur a ni lo.
3. Lirthei hmanga zin veivah leh mipui chetvel chungchang
Mizoram chhung khaw kar kawnga khualzin phur lirthei leh mahni lirthei kenga zin chhuak bakah khawpui chhunga service :- Taxi leh Auto Rickshaw-te chuan registration-a seating capacity tar lan aia tam an phur tur a ni lo. Lirthei khalhtute leh an phurhte’n face mask an vuah vek tur a ni a, passenger-te hman tur hand sanitizer an pai reng bawk tur a ni. Driver/conductor-in a bitzing thei ang berin lirthei chhung, thutna leh vawnbante uluk takin an tithianghlim (sanitize) thin tur a ni.
