931/2026-2027

Siaha, 10th June, 2026 : Vawiin chawhnu dár 1 khan DRDO Conference Hall Siaha-ah Siaha RD Block hnuaia Siaha khawpui chhung Village Council member leh line department-te pualin MGNREGA thlakna Viksit Bharat – Guarantee for Rozgar and Ajeevika Mission (VB-G RAM G) inhrilhhriatna hun hman a ni a, District Bawrhsap Pu VL Hruaizela Khiangte chuan khuallian niin a hmanpui.

Khuallian District Bawrhsap Pu VL Hruaizela Khiangte chuan thu sawiin MGNREGS thlakna tur scheme thar VB-G RAM G hi July ni 1 aṭangin hman ṭan a ni dâwn tih sawiin, sawrkarin ruahmanna (scheme) thar a siam hnuaiah inkaihhruaina fel tâk (guideline) duan ṭhin a ni a, chumi mila hna thawhthiam a, insiamrem thiam a pawimawh a ti. Mipuite leh VC te pawh tih dan ṭhin sahuai thingvawn tlat lo tur leh ruahmanna thar a awm anih chuan chumi mila kal mai chu a ṭhat thu a sawi bawk. Harsatna an tawk anih pawhin enkawltu department hriatpui loha lo herrem tawp lo tur leh Department hnenah rawtna thlen nachang hriaa râwn ṭhin turin a chah.

Pu M. Misael, PD, DRDO, Siaha District chuan Viksit Bharat 2047 hawi zawngin ruahmanna tam tak siam a ni a, VB-G RAM G pawh hi chumi mila herrem zel chu niin kum khat chhungin ni 125 inhlawh theih a ni dâwn a, tun dinhmunah ni khatah ₹281 an hlawh tur thu a sawi. Scheme thar a awm reng rêngin mipuite hnena hriattirna/zirtirna neih hi tih mamawh a ni a, Siaha RD Block in a nachang an hria hi an fakawm a, State level ah neih a ni tawh a, District leh village level ah neih chhunzawm zêl tum anih thu a sawi bawk. VB G RAM G ah chuan sawrkar laipui leh Mizoram sawrkar intum sem tur hi 90:10 a ni dâwn. Mizoram sawrkar  in sum leh pai a do letna a nasa tawh dâwn a, chuvangin hna quality ṭha an duh dâwn a, thikthu pawh an pek chhiat a rinawm thu sawiin mipuite leh VC te pawh a ṭha thei ang berin mi thiam zawkin min duansak anga hna thawk tûrin a chah.

Pi C. Galilee, APO, MGNREGA, Siaha RD Block chuan VB-G RAM G chungchang presentation a nei a, zawhna chhanna leh sawihona hun hman a ni. Pu K. Lalramdinmawia'n Supreme Court thuchhuak anga bawlhhlawh sawngbawl tura thupek 'Solid Waste Management Rules 2026' chungchang zirtirna a nei bawk.

Vawiin hun hman hi BDO Pi Zorinsangin a kaihruai a. Lawmthu sawina neih hnuin hun hman tih tawp a ni.