1311/2024-2025

Siaha the 25th July 2024: Siaha RD Block huam chhung, Village level-a Mahatma Gandhi National Rural Employment Guarantee Scheme (MGNREGS) keng kawhtu Village Employment Council (VEC) te tan vawiin khan training buatsaih a ni a, he training hawnna inkhawm hi BRC Hall, BDO Complex, Siahatla-ah neih niin Block Development Officer Pu Manesia Khaimeichho chuan he hun hi a kaihruai a ni.

Ni 2 awh tur training hawnna inkhawmah hian Siaha DRDO Project Director Pu M Misael chuan training chhim tura kal te chu chibai bukin training hlawhtling tak an neih theih nan duhsakna a hlan. Pu M Misael chuan VC te pawimawhna sawiin Democracy ramah hmasawnna lung phum pawimawh tak an ni a ti a, Sawrkar laipui bakah State sawrkar Scheme tha tak tak hlawhtlinna bul pui an ni tiin an mawhphurna a sang hle, a ti. Mipuite thlan tlin an nihna hre reng tura chahin theihtawpin ram leh hnam tan thawk chhunzawm zel tur leh rawng an bawl sak mipuite dah pawimawh hmasa ber a, RD department tha taka an thawhpui thin angin department dangte pawh thawh pui a, scheme hrang hrang hlawhtlinna ni chhunzawm zel turin a chah bawk. DRDO Project Director chuan MGNREGS hnuaia hmalakna “Project Rotling - Hmasawnna Rahbi Thar” chungchang pawh sawiin Short Term Project (kum 1 chhunga thawh zawh tur), Medium Term Project (kum 2/3 chhunga thawh zawh tur) leh Long Term Project (kum 5 chhunga thawh zawh tur) awmin Mizoram chhunga RD Block 28 atangin concept paper 84 a lut a ti a, State-Level Monitoring Committee in project 15 ah an lo thlitfim thu tarlangin Siaha District atangin Project 2 (Medium Term Project hnuaiah Common Facility Centre at Kaochao East Village leh Long Term Project hnuaiah Sustainable and Holistic Development of Agriculture & Allied at Lobo) thlan an ni chu lawmawm a tih thu a sawi. Kalkhawmte chu an hnathawhnaah dikna leh rinawmna hma chhuan tlat turin leh sawrkar hotute nen in rawn tawn a, infinchhuah tawn thin turin a chah bawk.

VEC training hi ni 2 awh tur niin vawiin hian Siaha Khaw pawn VEC te tan buatsaih a ni a, naktukah khawchhung VEC te tan buatsaih leh a ni ang. VEC training hawnna inkhawm zawh hian training hun hman chhunzawm nghal niin resource person ten topic hrang hrang hmangin zirtirna an pe a, Pu C Lalremruata, Works Manager, DEGSU chuan NRM Works, Agri & Allied thupui hmangin zirtirna a pe a, Pu Elson Eliasa Notlia, BFT chuan Timely Payment & MIS Related tih thupui hmangin zirtirna a pe a, Pi C Galilee, APO chuan Non- ABPS, Mobile Registration & Others tih thupui hmanga zirtirna pein Pu Chhithatu Hlychho, Technical Asistant chuan Geo-Tag, Estimates & Others tih thupui hmangin zirtirna a pe thung a ni. ‎