4824/2025-2026

Dated Siaha, the 13 March, 2026: Vawiin khân Siaha Vaihpi Field, Siahaah Mizote kut ropui bêr Chapchar Kût hman a ni a, mipuiin an hlut hle. Kût Pa hi Pu VL. Hruaizela Khiangte, district bawrhsap niin Kût thlengtu hi Pu N. Viakhu, Chairman, MADC a ni.

Kut thlengtu Pu N. Viakhu chuan kumin Kût thupuiah 'Zonun Ze Mawi Inremna' a ni tih sawiin Kût hmangtu zawng zawngte chu hlim leh inrem tâka hun hmang tûrin duhsakna a hlan.

Thu sawiin Kût Pa Pu VL. Hruaizela Khiangte, district bawrhsap nibawk chuan, 'Khawvela hlu bêr chu inremna a ni hial awm e, inrem theih lohna hian harsatna a siam a; indona hial a thlen ṭhin' a ti. Chapchar Kût chu inremna ni, tihtauh leh innghirngho rem lohna nì a ni angin chhungkua inrem ila, chumi aṭang chuan ram leh hnam siamṭhat hna thawk chhunzawm thei tûrin thlamuang takin rilru a sen theih tawh ṭhin a ni, a tibawk. Mizote chu hnam tlêmte kan nih avangin inrem leh inlungrual taka zaikhata luangza tur kan nih thu Kût Pa hian sawiin, 'Hnam hrang hrang awmkhawm hi Mizo kan ni a, kei chu chumi hnam chu ka ni tia inlahrang tham kan awm lo,' a ti. Faina leh Ruihhlo do chungchang Kût Pa hian sawi bawkin, ṭhalaite hi tun ang renga ruihhlo laka an fihlim loh chuan nakin lawka kan ram leh hnam tana hna ṭha tak tak thawk thei tur an vàn a hlauh thu sawiin ram leh hnam dam nân ṭhalai rilru leh taksa a hrisel a ngai thu a sawi. Kum hmasa lamah Siaha District in khawpui fai intihsiakna leh khawpui cheimawi inelnaah lawmman an la chu lawmawm a tih thu leh kum dangah pawh lawmman la thei tûra ṭan la sauh sauh tûrin kut hmangtu kal khawm zawng zawngte a sàwm bawk.

Siaha District chhunga mi hmingṭhate hnena hlan ṭhin 'Chawimawina Nopui' chu Prof. Chawngkhuma Chawngthu hnenah hlan niin, Chapchar Kût hmannaah hian mal zai, hnam lam leh hnam incheina hmuhnawm tâk entîr a ni a, fai inzirtirna neih bakah chanchinbu ṭha lawmman sem a ni bawk. 

Chapchar kut Miss-ah Nl. Lara J. Zonunengi, New Siaha leh Mister Tv. Joseph Lallungmuana, New Colony thlan an ni a. Kût naa kal inchei nalh mipa puitlingah Pu Lalhmingliana, Siaha leh hmeichhe puitlingah Pi Lalmuanpuii, Siaha Vaihpi thlan an ni a, mipa naupang inchei nalhah Lalrawngbawla, Meisatla leh Hmeichhe naupangah Leona Ramhmachhuani, Siahatla thlan a ni bawk.

Kut thlengtu Pu N. Viakhu an lawmthu sawina a nei a, kham lo takin kum a ṭiak a ni.