4058/2023-2024

Dated Siaha 6th March 2024: Vawiin chawhma dar 10:30 khan Administrative Training Institute (ATI) leh Mizoram Consumers' Union, Aizawl tangkawp buatsaihin 'Consumer Awareness Campaign' chu MYA Multipurpose Hall, New Siahaah neih a ni a, Pu Mark. Lalthanliana, Joint Director, ATI chuan inkhawm hi a kaihruai a, Pi Lalnunmawii Addl. DC chuan hun a hmanpui a ni.

Pu Mark Lalthanliana, chuan kalkhawmte chibai bukna nei hmasain, Aizawl lam atanga lokalte inhmelhriattirna a nei nghal a. Kalkhawmte chu thahnem ngai leh rilru tha taka pe turin a sawm a, mipui leh sumdawng bakah mipui leh sawrkar inkarah inrintawkna a awm theihna turin vawiin Awareness Campaign- hi a tangkai dawn hle tiin, Siaha District- a Consumer ten hmasawnna an neih ngei a beisei thu a sawi.

Pi Lalnunmawii Addl. DC chuan Siaha district chhunga 'consumer' te tan hun tha tak buaitsaih a ni chu lawmawm a tih thu tarlangin, Consumer- ten an hlawkpui ngei a beisei tih a sawi a. A bik takin ATI- ten Siaha district mipuite ngaihpawimawh a, hun hlu tak seng a 'Awareness Campaign' an lo nei chu fakawm tiin, an chungah lawmthu a sawi bawk. Pi Lalnunmawii chuan ATI chu Mizorama 'Training Institute' tha leh rintlak ber an ni a, mithiam tak tak ten Consumer chungchangah zirtirna an nei dawn a, mipuiten an hlawkpui dawn hle a ni, a ti. A bik takin 'Resource person' chu hna thiam leh experience tam tak nei a nih avaning mipuite pawh uluk taka ngaithla turin a sawm a ni.

Siaha district - a consumer ten an dikna chanvo an hriat chian a tul hle tih sawiin Pi Lalnunmawii chuan 'Awareness' neih that tawk loh vang nge 'complaint ' lam a awm tam lo hle a ti a, heihian zawhna lian tak a siam a, complaint- tur a lo awm lo a nih chuan thil lawmawm tak a ni a, chutih rualin a nachang hriatloh vang a nih erawh chuan mipuiten hmabak kan la ngah hle tih a tichiang hle a ti. District Consumers' Union - ten theihtawp an chhuah nia a hriat thu sawiin Pi Lalnunmawii chuan tundinhmunah engkim felfai lo in, duhthu a sam kher lo ang, chutih rualin an thawh chin chinah fak an phu em em a ni, a ti.

Mipuite pawimawhna sawiin Pi Lalnunmawii chuan vawiina an zirchhuahte chu tangkai taka hmang turin a chah a. Thil lei leh hralhah eng dikna an neih, eng mawhphurna nge an neih tih chu hrechiang a, a taka chhawr thiam turin a chah a. Awareness Campaign- a kalte chu midangte zirtir chhawngtu ni theuh turin a sawm a, Awareness hlawhtling tak an neih theih nan duhsakna a hlan nghal bawk.

Resource person Pu C. Laldawngliana, Vice President, MCU, General Headquarters, Aizawl chuan mipuite hnenah zirtirna hun a hmang a. Consumer chungchang, Consumer dikna leh chanvo, Consumer mawhphurhna, Consumer Protection Act 2019, Consumer Dispute Redressal, complaint chungchanga hriattur, Dan bawhchhiatna leh hremna leh thupui dang hrang hranah zirhona neih niin, zawhna leh chhanna hun tha tak hman a ni bawk.

Professor. Chawngkhuma Chawngthu, President, Siaha District Consumers' Union chuan kalkhawmte hnena lawmthu sawina neiin hun a khar a ni.