4094/2025-2026

Siaha, 22nd January 2026 : National Cooperative Union of India (NCUI), New Delhi, Mizoram Sawrkar Cooperation Department leh MADC-a Cooperation Department ṭangkawp buatsaih 'Comprehensive Training and Capacity Building Programme' chu vawiin khan MADC Golden Jubilee Hall, Council Vaih Siahaah neih a ni a. Pu S. Beirahmo Syhly, Executive Member i/c Cooperation Department, MADC chuan khuallian niin a hmanpui.

Thu sawiin khuallian chuan Society te'n an mamawh tak ' Capacity building training programme' buatsaih a ni chu lawmawm a tih thu tarlangin, kal khawmte lawmpuina a hlan a. Pawl hrang hrang aṭanga training- tura kalte chuan hun hlu tak an hman chu ngai pawimawh a, khawtlang leh pawl hmasawnna pawchhuak turin a chah a ni. Pu S. Beirahmo Syhly chuan an awmna Society ṭheuh aṭangin chhungkua leh ram chawikanna tura a thara rilru seng turin kalkhawmte a sàwm bawk.

Vawiin hun hmannaah hian Pu Chandan Singh, Assistant Director, NCUI, leh Pu S. Raghuvanshi, Assistant Director, NCUI ten thupui ṭhen hrang hrang hmangin sawrkar laipui Ministry of Cooperation hmalakna thar, NCUI Policy bakah NCUI hmalakna tharte inhrilhhriatna hun an hmang a. Primary Agricultural Credit Societies leh tunlai khawl thar hmanga hmasawnna leh sawrkar hmalakna hrang hrang kalpui theih danah te zirtirna an pe a. Zawhna leh chhanna bakah sawihona hun hman a ni bawk.

Capacity Building programme hi Pi N.  Maki, DRCS, Cooperation Department, MADC-in a kaihruai a, Siaha khawpui chhunga Society hrang hrang bakah Lunglei leh Lawngtlai district-a Society member-te an tel a ni.