3630/2023-2024

Dated Siaha 2nd February 2024 : Vawiin khan District Level Committee on Fire Prevention (DLCFP), Siaha District District chu an Chairman leh District Bawrhsap ni bawk Pu Lalhmunsanga Hnamte kaihruaina in DC Mini Conference Room-ah an thukhawm a, kangmei chhuak ven dan chungchang leh Siaha District-a 'Fire week' hman dan tur chungchangte an sawiho a ni.

Pu Lalhmunsanga Hnamte chuan ramngaw tichereutu lian tak pakhat chu kangmei chhuak hi a ni a, heng kangmei avang hian chenna In tam tak pawh a lo kangral fo thin a, nunna hlu tak pawh chan hial a lo ni tawh thin a, a pawi hle a ni, a ti. Nikum chhung ringawt pawhin Mizoram hmun hrang hrangah ram a kang nasat thu sawiin, Siaha District- ah ngei pawh kangmei chhuak vawi 214 lai a awm a, heihian kangmei chhuak tur venhimna kawnga tan lak a tul zia a tichiang hle a ti. Kangmei chhuak tam zawk chu mahni huan leh lo/leipui hal vanga chhuak thin a ni a, hemi kawngah hian fimkhur zawk a huan leh lo te hal a tul takzet a ni, a ti. Hei vang hian invenna felfai taka kalpui a pawimawh takzet a, mipuite hnena zirtirna pek kawngah pawh Department leh khawtlang aiawhte an pawimawh hle a ni, a ti.

Vawiin thutkhawmah hian thupui hrang hrang sawiho a ni a. 'Fire Prevention Week 2024' hawnna chu February ni 6 ah neih nise, a hmun atan Forest Hall, MADC tih niin khuallian atan EM, Environment & Forest, MADC tih a ni. He hunaha hian Siaha District chhunga Department hotute bakah Siaha town chhunga VC, NGO bakah MTP -Town Branch zawng zawngte sawm ni se an ti bawk. Lo nei mite tan March ni 15, 2024 ral hma ngeiin lohal zawhfel nise , chuktuah huan neite tan bik chuan February ni 29 ral hma ngeiin lo halfel ni se tih a ni bawk.

Vawiin thutkhawma sawiho zingah kangmei ven kawnga mipuite zirtirna 'Fire Prevention Awareness Campaign' chu atam thei ang bera neih nise an ti a. School leh College bakah khawtlang mipuite hnenah uar zawkin zirtirna kalpui nise an ti a. Kum danga lo tih tawh thin angin, kang mei chhuak tur venhim kawnga thawk tha khua- 'Best Villages' leh chanchinthar lama puangzar tha chanchinbu - Best Media te hnenah lawmmman pek leh nise tiin 'Green Mizoram Day' hman hunah lawmman hi hlan nise an ti a ni.

Vawiin thutkhawmah hian District Level Committee on Fire Prevention (DLCFP) member-te an tel tha hle a ni.