3056/2024-2025

Siaha the 18th November 2024: Vawiin chawhnu dar 1 khan Siaha District Level Yuva Utsav (Youth Festival) Organising Committee chu DC Mini Conference Hall, Siahaah Additional Deputy Commissioner Pu Abraham Beirazi Khithie hovin neih a ni.   

Pu Abraham Beirazi Khithie chuan kal khawmte chibai bukna neiin kum hmasa lamah pawh hlawhtling takin Yuva Utsav (Youth Festival) neih a nih tawh angin kuminah pawh department hrang hrangte tanrualna tha kan neih chuan a hlawhtlinna hmel kan hmuh ngei a rin thu a sawi.

Nehru Yuva Kendra (NYK) State Director & Siaha District incharge Pi Mercy Sellate chuan District Level Yuva Utsav (Youth Festival) kalphung leh kum hmasaa hman dan report a pe a. Kumin Yuva Utsav thupui chu "Panch Pran of Amrit Kaal: India @2047" a nih thu sawiin India ramin zalenna a neih atanga kum 75-na lawmna kal zel leh ram hmasawn leh ropui zawk ni tura inbuatsaihna a ni thu sawiin. Youth festival-a tel a titha zualte chu state pumpui intihsiaknaah tel chhunzawmin, state a tithate chu national level-ah intihsiakna an neih chho zel thin thu sawiin Siaha district atangin painting-ah national level-a pathumna dinhmun hauh thei an awm tih leh state huapa lawmman la pawh eng emaw zat an awm tawh thu a sawi bawk. Mizote chu hnam tlawmngai leh zakzum kan nih avangin mahni thiamnal deuh intihsiaknaah pawh tel kan hreh thintu Pi Mercy hian sawi langin zirlai naupang thiamna inthup kan haihchhuah theih nan chuan anmahni dawmkang zawnga inzirtirna leh inphochhuahna hun tha kan neihte an hmanthiam a ngaih thu sawiin, zirlai a tam thei ang ber tel turin a sawm nghal bawk. 

Yuva Utsav hi December ni 3, 2024-ah ECM Higher Secondary School, ECM Vaih, Siahaah hman ni se, tiin Organising Committee chuan a rel a. He hunah hian Science Mela Exhibition (Group leh Individual), Young Artist Talent Hunt - Painting, Poetry, Photography, Declamation (speech) Contest leh Cultural Event (Group) inelna te a awm dawn a, he inelnaa tel thei chin chu kum 14 leh kum 29 te an ni. Inelna hrang hrang endiktu tur pawh ruat nghal niin Siaha district chhunga Eklavya Model Residential School (EMRS) pahnih Niawhtlang leh Tuipang chu a bik taka sawm ni se tih a ni bawk.  Hemi ni hian sawrkar department-a tam thei ang berin dawrte (stall) siam ni se, mipui nawlpui tana hriattur sawrkar scheme hrang hrang leh department hmalaknate pholan nise tih a ni.