3675/2023-2024

Dated Siaha 6th February 2024 : Vawiin chawhma dar 10:30 khan Forest Conference Hall, MADC ah 'District Level Fire Prevention Committee' bultumin ‘Fire Prevention Week 2024’ hawnna hun hman a ni a. Pi Lalnunmawii Addl. DC chuan hun kaihruaiin, Pu S. Lalremthanga, Deputy CEM, MADC chuan khuallian niin a hmanpui.

Pu S. Lalremthanga chuan khawvel sik leh sa danglam nasa lutuk chu ramngaw kan tihkan nasat vang a ni tiin chenna tlaka siam turin ramngaw humhalh leh kangmei laka venhim a tul hle a ni, a ti a. In leh lo kang ral tam tak sawi tur a awm a, kangmei chhuak tam zawk hi mipuite kan fimkhur tawk loh vang a ni a, nunna hlutak chan a nih thin bawk avaning ngaihtuahna thui zawng seng a hmalak tul a ti. Mizoram chu kangmei chhuak lakah kan la fihlim tawk lo hle a, a bik takin Siaha district- ah pawh kangmei chhuak tam tak hmuh tur a awm thin a, hei hian tan lak nasat a ngaih zia a ti chiang hle a ti. Mipuite hnenah kangmei chhuak lo tura zirtirna kalpui uar sauh sauh a tul hle a, NGO leh VC lamte pawhin theihtawp lo chhuah se a duh thu a sawi a. Zirlaite zingah kangmei chhuak lo tura zirtirna Education Officer, MADC ten theihtawp chhuah an kalpui thin chu lawmawm a tih thu tarlangin, uar zawka kalpui zel turin a chah a. Mizoram district hrang hrang zingah Siaha District chu kangmei chhuak tlemna ber ni turin theihtawp chhuaha thahnem ngai taka penchhuak turin Siaha mipuite a sawm a ni. Khuallian hian vawiin inkhawma sawm bikte hnenah lawmpuina thilpek a hlan nghal a ni.

Pu Thaly T. Azyu, Conservator of Forest, MADC leh Memeber Secretary, District Level Fire Prevention Committee - ni bawk chuan report tawi pekna a nei a. Kum 2023 chung khan Mizoramah kangmei chhuak 214 lai awmin, ram hectare - 329 lai a tichhia a ti a. Hei hian tan lak nasat a tul zia a tilang chiang hle a ti. Siaha District bikah nikum chhung khan kangmei chhuak lo tura inzirtirna khua 22 laiah kalpui theih a ni, a ti a. MADC - a Forest Department leh Fire & Emergency Services, PHED, Mizoram - te nen thawhhona thatak kalpui thin a ni, a ti. Kangmei chhuak venna kawnga thawk tha khua te chu lawmman siamsak thin niin, chanchinbu lama thawhhlawkte hnenah pawh lawmman hi hlan thin a ni, a ti. Nikuma kangmei ven kawnga thawk tha ber khua chu Theiva niin, Chanchinbu lamah Kawleng chu titha ber an ni a ti a, kuminah pawh lawmman hi siam leh a ni dawn a ti. Kumina Khua leh Chanchinbu thawk tha te hnenah hian Green Mizoram Day- ah lawmman hlan a ni leh ang a ti bawk.

Kumin ‘Fire Prevention Week ’ thupui atan hian ‘Thapui Thawhin Kangmei Chhuak tur I Veng Ang U'’ tih thlan a ni a. Vawiin hun hmanna ah hian sawrkar Official leh VC- te bakah Don Bosco School, Siaha an tel a ni.