962/2024-2025

Dated Siaha,  26th June, 2024: Vawiin chawhnu dar 2 khan Siaha District Police bultumin  'International Day Against Drugs Abuse and Illicit Trafficking 2024'  hman a ni a, he hunah hian narcotic drugs, psychotropic substances leh controlled  substances -te chu hal ral nghal a ni.

Pu Ngurthansanga, SDO (S) chuan thu sawina neiin, dan in a phalloh ruihtheihthil dapchhuaka theihtawp chhuah thinte an fakawm hle a ti a. Khawtlang a lo him zawk nan leh thalaite ruihtheihthila an fihlim theih nan Police leh Excise te kutah engkim dah theih a ni lo a, NGO, Kohhran leh mipuite tantlang a tul tak zet a ni, a ti. Ram leh hnam hmelma lian ber chu ruihhlo a ni tih sawiin, kan ram, kan hnam a lo dam a, hmalam pan turin theihtawp chhuah a tul tih tarlangin; ruihhlo do kawnga  ke pen tlang turin Siaha mipuite a sawm a ni.

Pu K.L. Vulmawia, Superintendent of Police chuan thalaite ruihhlo laka fihlim turin mitinin mawhphurhna an nei tiin mimal, chhungkua leh pawl hrang hrangte tan tlan a tul hle a ti a. Police ten theihtawp chhuahin zu leh ruihhlo do thin mah se, do rem a har hle a, do rem turin thapui chhuah a tul tawh takzet a ti. Excise leh Police department - ten ruihhlo do kawnga hmalakna an neihah khawtlang mipuite thawhpuina tha a ngen nghal bawk.

Vawiin   'International Day Against Drugs Abuse and Illicit Trafficking 2024' pual hian Police leh Excise department-te man khawm 'narcotic drugs, psychotropic substances leh controlled  substances' chu District Hospital Incinerator-ah halral nghal a ni a.  Vawiina halral tak hi - Heroin (No.4)-  137.43 grams leh Alprazolam-  6 tablets, cheng 4,12,520.00 man a ni.