4105/2023-2024

Dated Siaha 9th March 2024: Nimin khan Mara Kut pui leh ngahihlut ber 'Lyuva Khutla ' lawmna chu District Play Ground Siaha Vaihpi, ah hman a ni a, Pu Elaisa Vahnie, MPA Executive Director,BACI chu khuallian a ni a, Pu Lalhmunsanga Hnamte chuan a hmanpui bawk.

Pu Lalhmunsanga Hnamte, District Bawrhsap chuan thutawi sawiin, 'Lyuva Khutla Organizing Board' te duhsakna avaning lawmthu a sawi a. 'Lyuva Khutla' chu a vawikhat telna a ni tih tarlangin, Kut nuam leh hlimawm tak hmang theuh turin Mara mipuite duhsakna hlanin Kut chibai bukna a nei hmasa a . Lyuva Khutla chu lawmna kut, Lo vah zawh hal hma awllen laiin an hmang thin a, zai leh lamin hlim taka lo hman tawh thin a nih angin vawiin Kut pawh hlim leh inremna nena hman a tul a ni, a ti. Pi leh puten serh leh sang an ngaipawimawh thin hle tih tarlangin, hnam ziarang leh tihdan phung vawn nun kawngah Mara hnam chu entawntlak tak an ni tiin, hnam ziarang vawng nung zel turin thangthar te pawhin rilru i seng ang u tiin a sawm a ni.

Pu Lalhmunsanga Hnamte chuan tunlai khawvelah thalaite ruihhlo lakah an fihlim tawhlo hle tih sawiin, hnam anga kan ral mai lohna turin thangtharte chu zu leh ruihhlo laka fihlim turin a ngen a. A bik takin Siaha district- a tlawmngaipawl te thawhrimna fakawm a tih thu a tarlang a, theihtawpin zu leh ruihhlo an do thin a, mipuite pawhin theihtawpa kan tawiawm a tul takzet a ni, a ti. Damdawi hmansual a hlaur hle tih sawiin Pu Lalhmunsanga Hnamte chuan tun hnaiah cheng tam tak hu damdawi man a ni a, chu bakah 'Poppy' chinna hmun te a lo awm reng mai tih hriat a ni hian, ruihhlo do kawnga hmalak a ngaih zia a ti chiang hle a ti.

Hnam ziarang leh nihphung chawisan a pawimawh zia sawiin Pu Lalhmunsanga Hnamte chuan hnam boral tam takte hian an zirang leh tawng an vawnghim that loh vang a ni a ti a. Mara ten an hnam tawng an vawnghim tha hle nia a hriat thu sawiin, entawntlak tak an ni a ti a, hnam zia leh tawngte tun aia uar zawka vawnghim zel turin a chah nghal a ni.

Nimina hman Kut hlu tak 'Lyuva Khutla' hi Mara Autonomous District Council (MADC) bultuma neih a ni a . Kut hmannaah hian hnam incheina hrang hrang entirna neih niin hnam lam, mimal leh group zai hrang hrang bakah hnam ziarang tilang thei thil tamtak pholan leh entir a ni bawk a. Kut tihlutu ber pakhat 'Chhivaw' leh 'Khydi' thlanna neih nibawkin, Lyuva Khutla 2024 Chhivaw atan hian Lizzie Azyu, College Vaih thlan niin, Khydi atan hian William Khuhly, ECM Vaih thlan a ni bawk.