4686/2025-2026

Dated Siaha, the 3, March 2026: Vawiin chawhnu dár 2:00PM khân DRDO Conference Hall, DC Complex, Siahaah Sawrkar lirthei khalhtute tán road safety awareness programme neih a ni a, Dr. Manesia Khaimeichho, District Transport Officer, Siaha District, Siaha chuan he hun hi a kaihruai a, kumin road safety awareness thupui chu Sadak Suraksha A-Jeevan Raksha (Road Safety - Life Safety) tih a ni.

Dr. Manesia Khaimeichho, DTO chuan hun hlu tak senga kal khawmte chu lawmthu hrilhin, sawrkar lirthei khalhtute chu sawrkar hnathawk an nih angin sawrkar dan zam (rules) kalh zawngin sawrkar lirthei khalh lo turin a chah.

Vawiin hun hmannaah hian Enforcement Inspector Pu MS Dawngliana, Traffic OC Pu A. Lalthianghlima leh MADC-a Assistant MVI B. Sawma ten traffic dan leh dun chungchanga hriattur pawimawh hrang hrang zirtirna an nei a, kalkhawmte zawhna an chhang nghal bawk.

Sawm bikte thusawi tlangpui chu:-

i. Lirthei ṭha khalh avang leh kawng lo ṭha chho zelah hian chak tak taka tlan hi a him lo, a chhunga chuangte ngaihven reng tur a ni.

ii. Lirthei khalhtuten lirthei an khalh laia an mizia hian pi leh pute zahawmna thui tak a hril tih hriat a ṭha.

iii. Lirthei dang leh kea kal mihringte inzah tawn tur.

iv. In leh lo a changkan ang zelin lirthei kan khalh laia kan mizia hi tih changkang ve zel tur.

v. Kawng a zim a, lirthei a pung zel bawk si a, duhna lai laiah lirthei dah (park) loh tur, sawrkar lirthei phei chu hetiang hmuna dah hi a inhmeh lo lehzual.

vi. Tlangrama cheng kan nih avangin chhuk leh chho a tam a, chho zawnga tlante ngaihchan thiam ni se.

vii. Hmanlai huna lirthei khalh phalna license nei zawng zawng smart card tir vek tur a ni.

viii. Mahni license neihna lirthei chiah khalh tur.

ix. Thinrim chunga lirthei khalh loh tur. Hahdam leh harhvang takin khalh ṭhin tur a ni a. Hrisel lohna leh nawmsam lohna neih chuan pi leh pute hrilh hreh loh tur.

x. In sa thar reng rengin lirthei dahna siam tel nachang hriat a ṭha.

xi. Lirthei khalhtu kan nih chuan mihring himna hi ngaih pawimawh ber tur.

xii. Siaha district chhunga lirthei chetsualna thleng zawng zawng zaa sawmriat (80%) chu a khalhtuin ruih a neih ṭhin vang a ni.

xiii. Lirthei chak tak taka tlan ṭhinte leh mipui harsatna thlen ṭhinte tan e-challan hman tum a ni a. Thil sual ti an awma lirthei number chhinchhiah hman anih chuan e-challan hmangin hma lak tum a ni a, an leiba an tlak hma chuan khawlin a chhinchhiah reng tawh dawn. E-challan hian state dang lirthei pawh a huam vek dawn a, lirthei lei leh hralh chungchangah pawh fimkhur lehzual a ṭha.

District Transport Officer Office Siaha buatsaih vawiin hun hmannaah hian  Mizoram sawrkar hnuaia department hrang hrang lirthei khalhtute leh MADC hnuaia department lirthei khalhtute an tel a, Pu Vabeibikhu Hlychho, DTO Staff Siaha-in lawmthu sawina a nei a, hun hman tihtawp a ni.