3632/2023-2024

Dated Siaha 2nd February 2024 : Vawiin chawhma dar 10:30 khan Chief Judicial Magistrate pisaah Pu Vanlalenmawia, District & Session Judge, Lunglei Judicial District, leh Chairman, District Legal Services Authority ni bawk kaihhruainain thubuai ngaihtuah lai Jail tang ‘Under Trial Prisoner’ chungchang leh Crime Review chungchangte sawihona neih a ni.

Pu Vanlalenmawia chuan khawvel changkanna in a ken tel pakhat chu sualna lo pung ve zel hi a ni, a ti a. Thil tisualtute an phu tawk a hremna pek a tul hle a, dan anga kal angaih avangin 'evidence' tha tak a awm tel a ngai thung a ni, a ti. Evidence tha nei turin Ukil leh Prosecutor piah lamah thuhretu ( witness) tha a awm tel a ngai a. Mipuite pawh a tul ang a thuhretu a tan ngam pawh a pawimawh hle a ti. A bik takin eirukna thubuai ah duh ang tawkin 'evidence' a awm thalo thin a, hei hian Dan anga hmalak a ti thuanawp thin a ti. Dan kengkawhtu te piah lamah mipuite pawhin tihtur an nei ve a, Dan kengkawhtute tha taka lo puihbawm a tul hle a ti bawk.

Vawiin thutkhawmah hian thubuai nei Tan-in a tang mekte chungchang bakah Dan kenkawh chungchanga hmalakna tur hrang hrangte sawiho a ni a . Meeting zawhfel a nih hnu hian District & Sessions Judge, Lunglei Judicial District hian District Court building luah lai, Siaha Vaihpi ah inspection a neih chhunzawm a. Staff- te dinhmun a endik bakah Bar Association, Siaha te nen inkawmhona hun an hmang nghal a ni. District & Sessions Judge, Lunglei Judicial District hian Siahatla a District Court building sak lai mek chu Contractor leh PWD, Siaha hotute nen an endik nghal bawk a ni.

Vawiin meeting- ah hian Pu H. Rohlupuia, Addl. District & Sessions Judge, Lunglei, Pu Lalngaihmawia Zote, Addl. District & Sessions Judge, Siaha, Pi Lalhriatpuii, Chief Judicial Magistrate, Siaha, Pi S. Ngotlia, Judicial Magistrate, 1st Class, Siaha, Sawrkar Ukil lam aiawh in Pi Rebecca L. Kompa, Addl. Public Prosecutor, District Magistrate, Siaha aiawh in Pi Lalnunmawii ( Addl. DC Siaha), Pu Dingluaia, IPS (Superintendent of Police, Siaha), Pu HC Lallianvuta, Superintendent, District Jail Siaha, Pi Zarzoliani SI, Department of Excise & Narcotics aiawhte an tel a ni.