2902/2023-2024

Dated Siaha 1st December 2023 : Vawiin khan District AIDS Prevention and Control Committee huaihawtna hnuaiah Bazar Traffic Point, Vaihpi, Siahaah 'World AIDS Day' 2023 urhsun taka hman a ni.

Pu Lalhmunsanga Hnamte, District Bawrhsap leh Chairman, District AIDS Prevention and Control Committee ni bawk chuan HIV darh zel tur venna kawng a thawktute zahna chibai a buk tih sawiin, tha thlah lo va theihtawpa ram leh hnam tana thawk zel turin a chah a. HIV- do na kawngah Kohhran, NGO leh khawtlang mipuiten theihtawp chhuah a tul tih tarlangin, thawhhona tha hnuaiah Siaha District chhunga HIV vei pung lo a, hniam lam a pan zel a beisei tih a tarlang bawk. Siaha District Auto- Rikcshaw Owners Association-te tar tur Sticker hlanna a nei nghal a. Mipui phur thin lirthei khalhtuten HIV - do kawngah tih theih lian leh tangkai tak an nei tih sawiin, Sticker- tarah duhtawk mai lo va, an mipui phurhte hnenah HIV ven leh do na kawnga hrilhhretu leh theihtawp chhuah a thawktu ni zel turin a sawm a ni.

Pi Zingia Hlychho, Councellor, SA-ICTC chuan HIV/AIDS chungchang sawina a nei a. Tun dinhmunah Mizoram chu India rama HIV vei tamna ber a ni, a ti a. HIV/AIDS kaina lianber chu mipat hmeichhiatna hmansual a ni tih tarlangin, thalai chauh ni lovin, nupui pasal nei tawhte pawh mipat hmechhiat hmansualna hian a chiah hneh hle a ti a. Mipat hmeichhiatna kawngah fimkhur a tul hle tiin, insum theilote chu Condom hmang uar turin a chah. In chiuna hriau thianghlim lo atanga kai an tam hle a, a bik takin damdawi No-4 khawihten an kai nasa zual a ni, a ti. Damdawi khawih thinte chu hriau thianghlim chauh hmang thin tur in a chah bawk. Thisen thianghlim lo dawn palh avanga kai pawh awm theih a ni tiin, vanduaina vang a ni a, fimkhur zawka thisen endikna pawh kalpui zel a ni a ti. HIV vei te nena chenho, hnathawhho leh thosi seh atang te in HIV hrik a kai theih loh a , HIV kai theih dan leh kai theihloh dan hrechiang a, HIV veite endawng lo turin a chah. HIV do tur hian mitinin mawhphruhna an nei tih hria a, a do na kawngah khawtlang mipuite theihtawp chhuahpui turin a sawm bawk.

Pi P. Chaki, President, MCHP General Headquarters pawhin thusawina neiin, HIV do na kawngah theihtawp a penchhuak turin Siaha mipuite a sawm a. A bik takin chhungkaw nuten fa an enkawl kawngah tan la thar tur leh HIV/AIDS kailo turin chhungkua ah zirtirna tha lo kalpui thin tur in a chah.

Vawiin World AIDS Day hmanna inkhawm hi Dr. Vabeilysa DACO chuan a kaihruaia, Dr. Lalnunziri, Sr. Chief Medical Officer chuan lawmthu sawina neiin hun a khar.

World AIDS Day hi kumtin December ni 1- ah khawvel pumah hman thin niin, kumin thupui atan hian ' Let Communities Lead' tih chu thlanchhuah a ni.