4317/2023-2024

Dated Siaha 22nd March, 2024 : Vawiin khan Public Health Engineering Department (PHED) buatsaihin 'World Water Day 2024' hmanna Fel Fel Hotel-ah neih a ni a, Pu Abraham Beirazi Khithie, Addl. DC chuan khuallian niin a hmanpui.

Pu Abraham Beirazi Khithie chuan Untied Nation (UN) kaihruaina hnuaiah kum 1993 atang khan kumtin 'World Water Day' khawvel pumah hman tan a ni, a ti a. Pathian thilsiamte hi inchawmtawn leh in ring tawn tur kan ni a, kan mamawh chauh kan ei in tur a ni a, duham luat vanga chhiatna lian thlen kan phal tur ni lo a ti. Khuannuin tha taka a siam 'Ecosystem' tibuai leh tichhe zawnga kan khawsak thin hian a tuartu chu mihringte kan nih tel ve avangin 'natural balance' kan vawnhim tlat a tul hle a ni, a ti.

Pu Abraham Beirazi Khithie chuan khawvel thilsiamte enkawl turin mihring kan awm a, kan chungah mawhphurhna sang tak a awm a, he mawhphurhna hlen tur hian mitinin tan kan lak a ngai a ni, a ti. Khawvela thilsiamte enkawlna hna pawimawh tak pakhat chu tui hna humhalh hi a ni a. Tui hna titam leh siamthar zel turin thing leh mau kan humhalh that a ngai a, sawrkar department- te chauh ni lo in, VC, NGO leh mipuite pawhin tuihna humhalh turin mawhphurhna lian tak kan nei a ni tih i hrethar leh ang u a ti. Tui hna tamzawk siam leh humhalh turin inzirtina tha a tul a, midangte hnena sawi tam pawh a tul a ti.

Khuallian chuan Siahaah ngei pawh tui kan harsa em em a, hehian hmalak a tul zia leh tui renchem thiam a tulzia a tichiang hle a, mitinin mawhphruhna kan lak a tul a ti. Pu Abraham Beirazi Khithie chuan mipuite chu PHE Department- ah an innghat lutuk nia a hriat thu sawiin, tui thianghlim dawnkhawlna kawngah hmasawn kan ngai hle a ti a. Fur laia tui lo khawlna turin tui dawn leh tuizem tha tak siam a tul a, heihian kan tui mamawh thuitak min phuhruk dawn a ni, a ti.

Khuallian chuan kumin thupui 'Water for Peace' tih thlanchhuah a nih chhan hian tui a la vang zel dawn a, tui vanga inremlohna nasa tak lo awm thei tur laka kan invenna tur leh tui vanga inremna a awm theih nana hmalak a tul zia a tilang chiang hle a ti a. Mizoram ngeiah pawh khua leh khua, district leh distric angin inremlohna a chhuak thei a, chutiang chhuak lo tur chuan tun atangin thahnem ngai taka kan thawhho a tul hle a ni, a ti. Mitinin tui thianghlim mamawh tawk kan neih theihna turin hma i la tlang ang u tiin kalkhawmte leh Siaha mipuite a sawm a ni.

Pu Israel Chizah, GS, MTP General Headquarters chuan PHED - ten mipui rawngbawltu an nihna hria a, tui thianghlim in tur pek chhuah kawnga an hmalakna leh hnathawh fak awm a ti thu a sawi a. A bik takin PHED leh MTP inkarah thawhhohna tha tak a awm thin a, a hlu in vawnnung zel a tul hle a ti a. Siaha District mipuiten tui thianghlim in tur tam zawk an neih theih nan, MTP- ten theihtawp chhuahin PHE Department an puih zel tur thu a tarlang bawk.

Pu Viasai Solo, Sr. Executive Engineer, PHED, Siaha WATSAN Division chuan tuihna enkawlna kawnga thawktha khuate hnenah lawmman semna hun a nei a. Lawmman dawngtute chu

Pakhat na - Tokalo WATSAN Commitee

Pahnih na- Laki WATSAN Commitee

Pathum na -Kawlchaw East, WATSAN Commitee

Pu. P.C. Lalthanliana, SDO, PHED, Siaha chuan lawmthu sawina neiin hun a khar a, 'World Water Day' hi kum tin March ni - 22 ah khawvel pumah hman thin niin, kumin thupui atan hian ' Inrem nan Tui' tih thlan a ni.