No.2024/2021-2022
Aizawl 27th August 2021: Vawiin khan Sialkal Range Development Council (SRDC) chuan UPSC Civil Services coaching kal mek pakhat, NDA, X-Ray technician leh Lab-Technician zirlai thlan bik, SRDC area a mite hnenah tanpuina SRDC Chairman Office Chamber-ah pek an ni.

Pu L.Thangmawia, Chairman SRDC chuan Chief Minister zahawm tak Pu Zoramthanga zarah SRDC chuan hmel thar a hmu a, ni danga tih ngai loh zirna lama SRDC sum hman theihna pawh 2019 khan Mizoram sawrkarin min siam sak a ni, a ti a. He scheme hnuaiah hian zirlai thiam thei, khawsak harsa zual mi 23 lai tanpuina pek an nih tawh bakah SRDC area huam chhunga sawrkar sikula zirtirtu indaihlohnaah SRDC chuan zirtirtu kum tin a rawihsak bawk a. Aizawl Luangmual-ah SRDC area zirlaite tan Cheng nuaih zahnih senna tur Hostel sak mek a ni tih thu a sawi bakah Chairman chuan heng avang ngawt pawh hian zirlaite leh zirlai nu leh pa ten lawmna chang kan hriat a tul hle a ni, a ti a. Zirlaite chu an vanneih zia hriaa khawtlang leh ram tana chhawr tlak ni tura zir chhuak ngei turin a fuih bawk. He hunah hian SRDC Chairman chuan Tv Paukhanmunga, Primary School zirlai a nih laia Electric man avanga kut pahnih chan ta, chhungkaw harsa tak ni bawk, chuti chunga BA pass a, MA hial zirzawm thei chu SRDC in zirlaite tana Ambassador tura a ruat thu puangin, ani atang hian kut ke kim nei, duh tawka kut hmang theite tana chona nasa tak a nih thu a sawi bawk.

He hun hi Pu Ngulzathuama, Development Officer SRDC in a kaihruai a, zirlai sponsor te hming tarlangin UPSC Civil Service coaching, ALS New Delhi-a kal mek Neihhlupui hi Rs 1,00,000 a sponsor a nih thu te, Nikum 2019 a Mizoram atanga NDA interview tura tling awmchhun Muandingliana, Teikhang khua chu Rs 1,02,000 a interview-na tura coaching kalna leh senso dang zawng tumsak a nih thu te, Dingmuansanga, Kawlbem, X-Ray Technician zir tur sponsor nan Rs 36000 leh Vungthanpuii, Mimbung, Lab-Technician zirlai sponsor nan Rs 36000 hlan an ni tih a report a ni.

Tun kum kalta 2019 leh 2020 khan zirlai first division a pass, chhungkaw harsa mi 23 te tan Rs 15000 zel, a vaiin Rs 3,20,000 SRDC in a pek chhuah thu te tarlang a ni a. Tunah hian SRDC area chhunga zirna in hrang hranga indaihlohna phuhruk tura SRDC sum atanga Zirtirtu 9 rawih mek an nih thu a sawi lang bawk.

SRDC in zirlai a sponsor-te leh an chhungte a tangin lawmthu sawina leh hetiang tanpuina an dawn hi ropui an tih thu bakah theih tawp chhuaha chhawrtlak ni ngei tura zir chhuah ngei an tum thu an sawi a ni.

He hun hi SSPP Headquarters, Aizawl hruaitute leh SRDC Hostel & Education Committee member te leh sawmbik ten an hmanpui a ni.