No.3052/2021-2022
Aizawl 19th November, 2021 : Nimin nileng khan Sialkal Range Development Council(SRDC) chu an Chairman Pu L. Thangmawia, MLA hovin SRDC Cell Office, Venghlui, Aizawl-ah a thil pawimawh tak tak ngaihtuahin an thukhawm a, he hunah hian SRDC area Baseline Survey a bu a an buatsaih chu SRDC Chairman Pu L.Thangmawia’n a tlangzarh a, SRDC area huamchhungah kum 2022 atangin Faina beihpui thlak an rel a ni.
Council meeting hi Pu L.Thangmawia MLA, Chairman, SRDC chuan kaihruaiin kum 2021 chhunga SRDC hmalak mekna te thlir ho a ni a. SRDC hmalak mekna chi hrang hrang – SRDC area hmasawnna tura hmalak mekna te, Zirna kawnga hmalak mekna te, hriselna lama hmalak mekna te uluk taka thlirho a nih hnuah a lungawithlak thawkhatin Council chuan a ngai a ni.
SDRC Chairman-in a tlangzarh tak SRDC area Baseline survey report bu a a lan danin SRDC area huamchhung khaw 6 ah in 1655 awmin leh mihring 9997 an cheng a, in 1655 zinga 119 te chu a chung thilthek leh di (thatched roof) a la ni a, lo neia eizawng za a sawm sarih (70%) vel la awmin zirna lamah ziak leh chhiar thiam lo khawtinah za a 5.65% atanga 13.05% inkar an la awm a, pawl sawm pass si Graduate thleng zo ta lo an tam hle a, Infant mortality Rate pawh a la sang hle a, SRDC area a chhungkaw 75% vel zetin thlakhatah cheng 10000 aia tlem an la lut a ni.
Council meeting chuan baseline survey hna tha taka thawhsaktu Pu Lalthlamuana Ralte chungah lawmthu sawiin heng data atang hian hriselna leh zirna kawngah te, retheihna um bo tura tan nasa lehzuala lak ngaiin a hre bawk a ni.
SRDC Council meeting chuan kum thar 2022 atangin SRDC area huamchhungah faina beihpui (Cleanliness drive) kalpui tan ni se a ti a, remchang hmasa berah biakhmuhtheihna hmanga he programme hi hawn (launch) relin, SRDC area huamchhung khaw tinah a bul tan nan khawchhung ti fai a hnatlangpui, Village Council kaihhruaina hnuaiah nei turin ruahmanna an siam nghal a ni. Faina beihpui thlakna turah hian SRDC area huamchhunga tlawmngai pawl hrang hrangte nena thawhho tha an ti a, a tul anga tlawmngai pawl te lo berawn a, hma lo la turin Pu Vanlaltanpuia MCS, SDO(Civil) Ngopa leh Member Secretary, SRDC ni bawk chu ruat nghal a ni.
Meeting hian SRDC Member Secretary office awmna khua Ngopa chu Mizoram sawrkarin Town a a puan chu lawmpuiin, faina kawnga Ngopa khua-in nasa taka hma an lak mekna tanpui nan Rs 50,000 (Cheng singnga) pek an pe dawn a ni.
Meeting hian SRDC logo chhawpchhuah chu pawmin hman nghal a rem ti a. Literature leh Cultural lamah hma thar lak a rel bawk a, SRDC office-a dah turin lehkhabu leh thuziak tha te hard copy leh soft copy-a khawn khawm turin rel a nih bakah, Covid-19 hrileng mekin ziaawm lam a pan a nih chuan hun remchang hmasa berah Cultural Meet puitham taka buatsaih an rel bawk a ni. SRDC area History leh culture chungchanga research project kalpui turin Dr Zoramdinthara, Associate Proffessor, MZU hnenah Rs 5,00,000 (Cheng nuaih nga) research project pek an remti a, SRDC area huamchhunga lumpsum GIA Higher Secondary School awmchhun Mimbung HSS chu dinhmun tha zawka Mizoram sawrkarin a dah hma atan kumtin Rs 2,00,000 (Cheng nuaih hnih) Grant-in-Aids pek thin ni se a ti bawk. SRDC area huamchhunga sawrkar sikul zirtirtu indaih lohna ah te SRDC Fund atanga zirtirtu rawih mek chu a pawm a, zirlaite hmakhua ngaihna avangin hei hi a tul ang a tih chhunzawm zel a rem ti nghal bawk a ni. SRDC area huamchhunga damdawiin awmchhun Mimbung PHC chu SRDC Fund atangin X-Ray leh khawl dang pawimawh kumtharah dah tur leh area huamchhunga Health Sub-Centre te tih changtlun a rem ti a, Dr ZR Thiamsanga MLA, Member, SRDC hova SRDC area huamchhunga hriselna lam a hma thar lak dan tur ngaihtuah tura Sub-Committee dinin rawtna a thlen ang te tih hlawhtlin remtih a ni bawk.
SRDC area huamchhunga chenna in chhe zualte in sak sakna turin Housing scheme kumthar atanga kalpui a remti a, in pakhat sakna atan Rs 1,20,000 (Cheng nuaihkhat leh singhnih) zel pek turin a ruahman bawk.
Council meeting-ah hian Member Secretary, Pu Vanlaltanpuia MCS chuan report pe in Hrianghmun leh Selamah SRDC Rest House sak hna zawh tawh a nih thu leh kumin chhunga hawn theih a nih tur thu te, Teikhang khaw tuilakna PHE Department in kum sawmhnih kaltaa a lo thawhsak tawh chu a pipe te a tuiek tawh avanga tui a haw that theih tawh loh avangin SRDC fund hmanga pipe thara thlak sak a nih tawh thu leh he hna hi kumin 2021 August thla khan Teikhang WATSAN Committee te nena thawk hova thawh zawh tawh a nih thu te, National Defence Academy-a written exam a tling Muandingliana, Teikhang Rs 1,02,000 leh ALS New Delhi a Civil Service Coaching-a kal Neihhlupuii, Kawlbem Rs 1,00,000 a tanpui an nih thu te, Technical zirlai pathum SRDC in a sponsor mek thu te, Covid-19 hri avanga kumin a area chhung khaw hrang hrangin harsatna an tawh phuhruk nan damdawi leh mamawh chi hrang hrang SRDC in a ngaihtuahsak thu te a sawi bawk.
SRDC area huamchhunga hmasawnna hnathawhte chu rotling taka thawh zel ni se a duh thu SRDC Chairman Pu L.Thangmawia chuan sawiin Entrepreneurship lam a thalaite hmasawn tir tura tan lak a tul thu te, remchang hmasaah SRDC member te Exposure tour nei a, area dang hmasawn dan te a hmun ngei a hmuh a, awmze neia tan la tura puan ven sawichhing turin member te a sawm a. SRDC hmalakna hrang hrangah area chhung mipuite tawiawmna tha tak an dawn thinnaah leh Mizoram sawrkar thuneitute duhsakna an dawn zawng zawngah lawmthu a sawi bawk a ni.
Attachment
- Loading attachment...
