Sialsuk khua chuan nimin khan an khaw huam chhung huapin ‘Nungcha te zalen ni’ an hmang a, Mizoram Chief Minister Pu Lal Thanhawla leh Bialtu MLA Pu K.S.Thanga, Parliamentary Secretary bakah NLUP Implementing Board Chairman Pu R.Selthuama, MLA, sawrkar mi pawimawh leh party hruaitu engemaw zat an tel.

Sialsuk Welfare Association leh Association for Environmental Preservation (ASEP) te huaihawt he ni hmanna ah hian vahrit panga chhuah zalen a ni a. Chief Minister chuan thu sawiin nungchate humhalh leh an hmakhua tur ngaihsak hi a Kristian a, kan thurin innghahna ber thil siam zawng zawng te hnena Chanchintha hril tur kan nihna ah pawh kan mawhphurhna pawimawh ber zinga mi a ni, a ti. Ramngaw, thing leh mau, nungcha humhalh hi mihringte dam khawchhuahna a nih thu tarlangin tur leh hmanraw hrang hrang hmanga a suat rem zawnga thiltih kan ching hi bansan a hun tawh a ni, a ti a. Tunhnaia Aizawl khawpui tui lakna ber tur a hraitute chu hrem tlak an nih zia sawiin hetiang thiltha lo tihchingte hi kan dem ngam tur a ni a, manchhuah an nih chuan hremna an pumpelh hauh lovang, a ti. Sialsuk khua in vahrit no an chawm len tuna chhuah zalen theiha awm ta chu a fak thu sawiin hetiang hi sawrkar lawmzawng a ni a, nungcha humhalh kawngah zirtirna tha tak a pe ngei ang a ti bawk.

He hun a thusawitu dang Pu K.S.Thanga pawhin Sialsuk tlangdung chu sawrkar tharah hmasawnna chak taka kawng zawh turin a inpuahchah mek a ni,a ti a. Tun maiah pawh a bial chhungah Department hrang hrang hmalakna hmuh tur tam tak a awm tawh a ni, a ti. Chief Minister meuhin helai tlangdung a hmun ngeia a tlawh chuan rah duhawm tak a chhuah ngei a rin thu sawiin Chief Minsiter kaihhruaina he bial mipuiin an rinngam zia a tarlang bawk.

Nungchate zalen ni hmanna hi ASEP President Pu K.Lalmuansanga’n a kaihruai a, Sialsuk khawtlang mipuiin he hun hi an hlut hle a ni.