Compensatory Afforestation Fund Management and Planning Authority (State CAMPA)  bultumin  ASEP chuan ni 13 November, 2013 (Nilaini) hian Aizawl Press Club-ah ramngaw leh nungcha humhalhna kawnga hmalakna peng pakhat atana ruahman, “Signature Campaign on Environmental Preservation Kick-Off” function an hmang a; Addl. PCCF, Environment & Forest  Department,  Pu Rosiama Vanchhawng, IFS, chuan Khuallian niin a hmanpui.

Pu Rosiama Vanchhawng chuan ASEP-in ramngaw leh nungcha humhalhna kawnga hmalakna pakhat atana Signature campaign an buatsaih chu tha a tih thu a sawi a.  He programme hi an campaign-naa kalpui zel tur anih avang leh miin signature meuh hnutchhiaha an intiam dawn avangin rah tha a chhuah ngei a beisei thu sawiin, “Zoram mipuite pawh he hmalakna hi lo tawiawmturinka ngen a che u,” a ti bawk. Khuallian hian Signature hnutchhiah hmasa berin, Campaign hawnna a nei a, ASEP member-te leh kalkhawm dangten signature an hnutchhiah zui ve nghal a ni.

He Kick-Off function hi ASEP President Pu K. Lalmuansanga chuan kaihruaiin, buatsaih a nih chhan a sawifiaha, he signature campaign hi a bultanna chauh niin ASEP-in ramngaw leh nungcha humhalh campaign a neihna apiangah kalpui chhunzawm zel a nih tur thu a sawi bawk.

He inkhawmah hian Goodwill Foundation School zirlaite telin signature an hnutchhiah nghal vek a; he programme hi ASEP chuan rampum huapa kalpui tura ruahmanin, Zirna in leh hmun hrang hranga campaign neihnaah kalpui chhunzawm zel a ni dawn a ni.