Nimin chawhnu dar 1:00 khan Sihphir Vengthar High School chuan 2011 HSLC Exam a an school atanga hlawhtlinna chang tharte lawmpuina hun an hmang a. Parliamentary Secretary Pu Lalthanzara chu khuallian niin Mizoram State Law Commission Chairman Pu R. Lalrinawma chu khualzahawm a ni.

Pu Lalthanzara chuan 2011 HSLC Exam a Sihphir Vengthar High School zirlai za a za an pass avangin chhuanawm a tih thu a sawi a. Hlawhtling tur chuan Pathian tih a pawimawh hmasa ber a, tunlai khawvel thiamna sang taka hlawhtling tur chuan tih tak zeta kan hmabak hna theuh kan thawh a ngai a ni, a ti. Zirlaite tan hlawhtling turin tum mumal neih a pawimawh thu sawiin ei leh in, zuk leh hmuamah fimkhur a, hriselna ngaipawimawh turin Parliamentary Secretary chuan a chah a. Sihphir khaw intodelh takah hian NLUP pawh hlawhtling taka kalpui a nih ngei a beisei thu tarlangin ram hmasawn nan sorkar hmalakna tawiawm tlat turin mipuite a sawm a ni.

Pu R. Lalrinawma pawhin HSLC Exam a hlawhtling tharte fuihin tihtakzetna nena hma la a, tang sauh sauh turin a chah a ni.

1994 a din Sihphir Vengthar High School hian Matric result a nei tha thei hle a, kum kalta 2010 HSLC Exam-ah pawh an zirlai za a za an passed a. Tunah hian zirlai 91 neiin zirtirtu 9 an awm mek a ni.