3036/2022-2023

Aizawl 13th December 2022: Vawiin khan School Education Minister Pu Lalchhandama Ralte chuan St. Francis of Assisi School Parents Day, St. Francis of Assisi Church Hall, Durtlang Leitanah khuallian niin a hmanpui.

Minister chuan thusawiin zirna sikulah elementary ațangin skill development kalpui tum a ni a, subject pakhatah telh tum mek a ni a ti.  Nakkum ațang chuan School bag ah loh ni (bagless day) pawh kum khatah ni 10 aia tam mah hman a, naupangten zirlaibu ak lova skill development an zir theihna tur siam a ni dawn a, school routine-ah te pawh telh a ni dawn a ni a ti. Zirlaiten nun an hman thiam a, thiam thil an neihna tur ang chi te zirtir an ni ang a, anmahni cho phur thei tur mithiamte thusawi tura sawm a, naupangte fuih phur țhin an ni dawn a, chumi atan chuan sorkar a inbuatsaih mek a ni a ti.

Minister chuan zirna leh culture hi a kal kawp a ngai a ni a ti a. NEP 2020 duhdan angin țawng chungchangah mahni țawng uar tir a, zirlaibuah pawh mahni  hnamzia telna pholan tum mek a ni a ti a. Zirlaibu ennawn mekah pawh Mizo hnam thil ngaihhlutna tur te, Mizo hnam ropuizia naupangte rilruah tuh te pawh a țul a, hnamdang ropuizia ngawt zir lovin Mizo hnam ropuizia hi zirlaiten an hriat a ngai a ni a ti.

Pu Lalchhandama Ralte chuan Mission-in a enkawl school-te hi thawktute inpekna a thuk avangin khawtlang tan an hlu hle a, co-curricular activities te pawh țha taka an kalpui avangin a lawmawm hle a ni a ti a. Mizoramah kohhran hrang hrangte zirnaah an inhmang tam sawt hle tih sawiin Mission enkawl school-ah te hian naupangte hi an kalna awm kawngah an hruai niin a hriat a, hei vang hian ram tan an pawimawh hle a ni a ti bawk.  

Pu Lalchhandama Ralte chuan Durtlang khawtlangin zirna lamah hma an sawn zel theih nan nakkum 2023 atangin Durtlang Higher Secondary School ah Science Steam hawn a ni dawn tih a sawi bawk.

St. Francis of Assisi School, Durtlang hi kum 1996 khan Catholic Church Durtlang chuan a din a, a tirah chuan Class KG-I leh KG-II chauhin bultan a ni a, kumtin class pakhat hawn belhin tunah hian Primary leh Middle School Section inkawp KG-I atangin Class VIII thleng zirtirna an kalpui mek a ni.

Kum 2000 atangin Capuchin Puithiam, Holy Trinity Province, Karnataka ten enkawl chhunzawmin tun thlengin an la enkawl zel a, Charity Sister ten school-ah hian zirtir hna an thawk bawk a ni. Missionary enkawl School a nih angin zirlai naupang khawsak harsa te kumtin engemawzat concession pek thin an ni a, tun session ah pawh hian zirlai naupang 42 concession pek mek an ni. Tunah hian zirlai 750 an awm a, Father 2 leh Sister 2 bakah teacher 15, Non-teaching 3 an awm a ni.

Vawiina St. Francis of Assisi School Parents day ah hian zirlaiten zai leh lam chi hrang hrang bakah lemchan te  an entir a. Principal Rev Fr. Vincent Monis a'n report a pe bawk. He school a thawk leh zirlai te, zirlai nu leh pa te leh kohhran hruaitute an kalkhawm a ni.