Aizawl District Rifles Association (ADRA) buatsaih 1st Inter Constituency Legislators\' Shooting Competition chu vawiin khan Mizoram Rifles Association (MRA) Shooting Gallery, Kulikawn ah neih a ni a, MLA 29 kal zingah 28 ten air rifles silai inkahsiakna an nei a ni.

Silai inkahsiak neih zawh a lawmman semna inkhawm tawite buatsaihah, Chief Minister Pu Lal Thanhawla chuan silai kah (shooting) hi Mizo thalaite chem kalna a ni tih sorkar chuan a hria a ni a ti a. Hetiang inelna thalaite zingah alo lar chhoh zelna tura MLA te tan inelna buatsaih a ni chu lawmawm a tih thu a sawi a. Association te hmalakna chu tha a tih thu sawiin, sorkar pawhin sum harsa chung pawhin hmasawn zel anih theih nan theihtawp chhuah a inpeih reng a ni a ti. Mizo thalai ten talent cho chhuah tham an neih thu sawi bawkin, discipline hrang hrangah sorkar chuan hma a lak reng thu a sawi bawk.   

MRA President Pu Richard Zothankima chuan MLA te tana silai inkahsiak buatsaih anihna chhan sawiin, MLA ten silai inkahsiak boruak hriat tir duh vang hrim hrim te, national levela legislators te tan hetiang inelna buatsaih thinah  a ti tha zual te tel ve se tih leh anmahni bial theuhah nungcha te kah nana silai hmanglo tura  inzirtirna petu leh silai kah thiam lama inelna an lo uar zawk theih nan buatsaih a ni a ti a. An association chuan catch them young thupuia hmangin district tinah naupang talent nei tha zawnna an neih thin thu a sawi bawk a, hemi lama sorkar inhawnna chu fakawm an tih thu a sawilang bawk a ni.

MRA hi kum 2006 khan lo ding tanin, tunah hian district 5 ah district level association din anih tawh a. Aizawl District Rifles Association bik hnuaiah hian club 14 an awm mek bawk a ni.

Vawiina Legilators te inelnaa point 80 hmu a silai kap thiam ber chu Thorang bialtu MLA Pu Zodintluanga a ni a, a dawttu point 76 hmu a pahnihna chu Aizawl South I bialtu Pu K.Liantlinga a ni a, a pathumna point 73 hmu tu chu Tawi bialtu Pu R.Lalzirliana a ni. An ni hian medal leh certificate dawngin abak zawng chuan participation certificate an dawng bawk a ni.

Attachment

  • Loading attachment...