2341/2022-2023
Kolasib: Dated the 17th October, 2022: District Magistrate, Kolasib chuan a hnuaia mi ang hian Silai licence chungchanga hriattur pawimawh thuchhuah a siam.

Mi thenkhat, silai licence-a silai chawpin emaw, a silai tel lovin emaw-zuar an awm a hriat a ni a. Tin, mi thenkhatin silai licence, eng silai mah la register loh pawh an zuar ni a hriat a ni bawk.

Silai licence neitu ten silai licence nei tho midang hnen atangin silai an lei emaw an hralh dawn chuan valid licence an neih ve ve a ngaih bakah a leitu turin silai lei phalna la hmasa in an silai lei emaw, hralh emaw chu an licence ve ve ah District Magistrate in an ziak lut ngei ngei tur ä ni.

Dan in a phal ang nilova silai leh a licence zawrh te, licence chauh zawrh te, licence nei lo hnena silai hralh te hi Dan kalh a ni. Tin, mahni hminga licence nei lova silai kawl hi section 25 of Arms Act, 1959 angin a rei lo berah kum thum (3) lung in tan theihna a ni. Hetianga Dan in a phal loh thil ti lui tu te chu an licence tih tawpsak an nih bakah Sawrkar in Dan angin a hrem ang.

Section 3(1) of Arms Act, 1959 angin silai (Fire-arms) hi mahni hminga silai licence nei te chauhin an kawl thiang a; Arms Rules 2016 hman a nih atangin mimalin midang silai retainer anga an kawl theih thin pawh tih tawp a ni tawh bawk.