2923/2022-2023
Aizawl 2nd December 2022: Vawiin khan Govt. Mizo High School tualah "Observance of Single Use Plastic Free Day" tih thupui hmangin National Pollution Control Day hman a ni a, Dr. Lalzirmawia Chhangte, School Education Secretary chuan a hmanpui.

Pu Lalzirmawia Chhangte chuan zirlai naupangte chu ram chhe zel tur leh a chhe tawh sa chhanchhuah a, hrechiang a, siamthatu ni turin a sawm a, hmankhat daih plastic hman a ngaihna chhante a sawi a. Kan ram neih chhun venhimna kawngah mawhphurhna nasa takin kan kutah a awm a ni tiin zirlai te chu a fuih a ni. Khuallian chuan India sorkar chuan 1/7/2022 khan single use plastic chu a khap thu sawiin, "a tha zawnga khawvel siamtha duh kan nih theihnan midangte tihhmuhtu, kawhhmuhtu, hmalatu kan nih a ngai a, mite tana entawn tur kan nih a tul a, mite tana thu thehdarhtu kan nih theih nan nasa taka ke kan pen a ngai a, mawhphurhna nasa tak kan kutah a awm a ni tih hre thar ang u" tiin zirlai naupangte chu a sawm a ni. India ram khawpui bal leh boruak chhe tak tak a awm thu sawiin, Delhi khawpui chu boruak bawlhhlawh, taksa leh hriselna atan thlenga hlauhawm tham a nih tawh avangin School te hial khar an ngai chu a ngaimawhawm thu a sawi bawk.

Hmankhat daih Plastic hi uar leh zual a hman kan inzirtir a, kan taksa mai piah lamah Pathianin atanga malsawmna kan dawn hi dimdawi taka kan enkawl a ngaih avangin uar leh zuala kan zirchhuah a tul thu a sawi bawk a ni a ti a. Pu Zirmawia Chhangte chuan kalkhawmte chu nunphung fel tak, thil tha tih duhnate, thil thaklo hnualsuat ngamnate nei turin leh kan ram, kan hman tana theihtawp chhuah turin a sawm a, in thil tih apiangah a sang ber, a tha ber nih tum turin a fuih bawk a ni.

National Pollution Control Day puala hun hmanah hian zirlai naupangten boruak, thing leh mau, leh ram tichhe lo turin thu an tiam hlawm a ni.

Pu Alfred Malsawmsanga, Scientist, Mizoram Pollution Control Board pawhin thusawiin India rama Mizoram-in Hmankhat daih Plastic inzirtirna kawnga kan tih that thute leh kan ram leh hnam Pollution laka kan ven a, kan dimdawi a ngaihthu a sawi a ni.

National Pollution Control Day hmanna hun hi Pi C. Lalthanpuii, Principal, Govt. Mizo Higher Secondary School-in a kaihruai a, Pi Pinky Zosangpuii, Deputy Secretary, School Education, Pu Lalhmachhuana, State Project Director, Samagra Shiksha Mizoram leh Officer dangten he hun hi an hmanpui a ni.