2294/2024-2025

Aizawl, September ni 30, 2024: Sinlung Hills Council Election 2024 lo awm tura Final Electoral Roll hman tur chu vawiin khan mipui en theih turin Aizawl DC, District Election Officer Er. Lalhriatpuia chuan Aizawl DC Conference Hall-ah a tlangzarh.

Aizawl District huamchin a Sinlung Hills Council Electoral Roll Final Publication a Elector awmzat chu a vaiin Voters 10,799 awmin mipa 5338 leh hmeichhia 5461 an ni a, mipa aia hmeichhia an tamna chu 123 a ni. Voter tlemna ber Polling Station chu Upper Sakawrdai Polling Station niin Voter 112 an awm a. Voter tamna ber chu Sakawrdai I Polling Station niin Voter 1219 an awm a. Sinlung Hills Council, Aizawl District huam chinah hian Constituency 6 awmin Polling Station hi 19 a awm a ni.

Ni 11.9.2024 - 17.9.2024 chhunga hming thunluh ngai, paih ngai leh siamthat ngaite dilna lutte chu ni 18.9.2024-23.9.2024 chhung khan ERO/AERO ten a hmunah kalin enfiahna an nei a. Electoral Roll te hi ni 24.9.2024-28.9.2024 chhunga peihfel a print an ni.

Aizawl DC chuan Sinlung Hills Council Electoral Roll hi Sinlung Hills General Election atana hman tur a nih angin MLA roll nen a in ang lo va, ngaih fin loh tur a nih thu a sawi a. Sinlung Hills Council Electoral Rolls, 2024 Summary Revision hi tluang tak leh hlawhtling taka neih theih nan a fimkhur tak leh thahnemngai taka thawk tute ERO, AERO leh BLO, Village Council, Political Party, thuthar lakhawmtute leh tlawmngai pawl hrang hrangte chungah lawmthu a sawi a ni.

Summary Revision neih atan hian Pu Mark Lalthanliana, ADC, Aizawl chu Electoral Registration Officer atan ruat niin Pu N. Lalzarzova, SDO(C) Sakawrdai leh Pi Malsawmhriatzuali, BDO Thingsulthliah te chu AERO atan ruat an ni bawk.

Vawiin roll tlangzarhna ah hian political party leh tlawmngai pawl aiawhte leh Aizawl SP, Education Department leh DIPRO atangte in an tel a ni.