Mizoram thalaite tan Rajiv Gandhi Stadium, Mualpui-ah Indian Army atan Sipai Lak Runpui (Recruitment Rally) May ni 7 – 9 inkarah buatsaih a ni dawn.
Rally ah hian Soldier (General Duty); Soldier (Technical); Soldier (Nursing Assistant) leh Soldier (Clerk/Storekeeper) te lak a ni dawn a. May ni 7 ah Soldier (General Duty) atan Lunglei, Serchhip, Lawngtlai leh Saiha District a chengte leh May ni 8 ah Soldier (General Duty) vek atan Aizawl, Mamit, Champhai leh Kolasib District a chengte an intlar thei ang a. May ni 9 ah sipai tanglai fate, sipai pension tawh fa te, sipai pasal sun tawh hmeithai fa te, NCC ‘C’ Certificate neite leh infiam mite chu an intlar thei ang. (Hei hian District zawng zawng a huam ang).
Hemi ni vek hian Soldier (Technical); Soldier (Clerk/Store Keeper); Soldier(Nursing Assistant) dil duh te chu an intlar theih bakah Defence Service Corps (DSC) bang tawh te pawh hemi ni vek hian an intlar thei ang. Soldier (Technical); Soldier (Clerk/Store Keeper) leh Soldier( Nursing Assistant) tante hian Hmarchhak state dang mite pawh an intlar thei ang.
May ni 10 leh ni 11-a te he Rally a tling te chu an Document leh an hriselna (Medical) endik a ni ang.
He sipai lak runpui atan hian a hmain dilna thehluh hran a ngai lova, a ni a intlar mai tur a ni ang. Soldier(General Duty) chu Pawl 8 pass chin tan dil theih niin kum bithliah chu 17 leh a chanve - 21 inkar a ni ang. Soldier (Technical) leh Soldier (Nursing Assistant) te tan chuan 10+2 (Science) leh Soldier (Clerk/Storekeeper) tan chuan 10+2 (Arts, Science leh Commerce) chin tan dil theih niin kum bithlaih chu 17 leh a chanve – 23 inkar a ni ang.
Hrechiang duh tan Army Recruiting Office, Supply Point Zembawk ah zawhfiah theih a ni a. He Office phone no. te chu 0389-2351166 leh 0389-2351518 te a ni. Aw record sa –Integrated Voice Response System hmangin phone no. 0389-2350141 ah a zawhfiah thei bawk a ni.
Intlar ni ah hian thuamhnaw inthlakna ken tel a that thu leh tunlai khaw awmdan en in document te chu sarang emaw file cover emaw (huh thei lova) dah turin ARO te hian intlar tumte chu an chah a. Hriselna endik hunah hian beng a fai tawk loh thin avangin leh taksa a tattoo an neih avangin mi tam tak an tla thin a, chuvangin beng ti fai turin leh tattoo tih reh chu ngaipawimawh turin an chah tel bawk a ni. Sipaia tlin hi mahni theina, merit based behchan anih avangin mibum hmang te laka fimkhur turin leh pawisa peka sipai a luh tir theia insawi an awm chuan chung mite chu thuneitute leh ARO te hnenah pawh hriattir (report) turin an ngen bawk a ni.
