Vawiin khan Staff Selection Commission (SSC) kaltlanga kumin atana Central Police Forces a Constable (General Duty) leh Assam Rifles a Rifleman (General Duty) lakna tur Recruitment Rally – Pre Selection Test leh Physical Efficiency Test neih tur chungchangah Col. Gaurav Chaturvedi, Commandant 26 Assam Rifles chuan MJA hruaitute leh chanchinbu mite sawmin, a office ah Press Conference a nei.

Press Conference-ah hian Commandant chuan Physical Efficiency Test neih dan tur ruahmanna duanlawk te a hrilhfiah a, candidate ten an hriattur pawimawh a tarlang bawk a. Rally hi felfai taka neih a nih theih nan, in sawi sak leh recommend loh tura a ngen rualin pawisa peka rally paltlang thei tira insawi an awm chuan, chungte chu a hnenah report turin a chah bawk a. Kohna (call letter) hmu te chu call letter a koh ni nghak kher lovin a hma thei ang bera in report theih a nih thu Commandant hian a sawi a. Rally ah hian video camera pahnih dah a ni dawn thu leh nitin in CD chu SSC lamah thawn thlak anih tur thu a sawi bawk a ni.  

Pre Selection Test leh Physical Efficiency Test hi SSC ruahman dan chuan February ni 6 leh March ni 25 inkarah, SSC atanga kohna(call letter) hmu te tan 26 Assam Rifles, Basketball Ground(Lammual bul) ah an buatsaih dawn a. Rally a Presiding Officer turin Commandant 26 AR  ruat a ni a.

Selection leh Physical Efficiency neihna hmun tur te hi Commandant chuan chanchinbu mite  a fanpui a, ruahmanna an siam te chu a hmuna a hrilhfiah bawk a ni. Press Conference ah hian chanchinbu mi 20 bakah Aizawl SP aiawhin Police Officer pahnih an tel bawk a ni.

Physical Efficiency Test paltang te tan hian SSC chuan written exam hi April 22 neih turin a ruahman a, Medical Examination hi kumin June leh July inkarah neih a ni ang a, a tlin result chu September ni 30 ah tih chhuah a ni ang.