2074/2022-2023
Aizawl, the 26th September 2022 : Vawiin chawhnu khan Aizawl DC Dr. Lalhriatzuali Ralte, IAS kaihhruaina in Col. Ranvir Singh Dhingra, Director Recruiting, Army Recruiting Office, Department thenkhat aiawhte, Local Council Association leh Salem Veng Local Council aiawh te Oct ni 4-9 chhunga Rajiv Gandhi Stadium, Mualpui a Sipai lak runpui neih tur atan hmunhma te an enho a. Hlawhtling tak leh felfai taka Sipai lak runpui hi neih a nih theih nan Department hrang hrang te hmalak tawhna thlir ho a nih bakah bawhzui ngai te sawiho a ni.

Aizawl DC Office leh Superintendent of Police, Aizawl tangkawpin Sipai lakna tur a candidate te tan Pre-Training Programme a buatsaih chu kalpui mek a ni bawk.