Tarlan tawh angin nakum January ni 15 atanga ni 17 thleng khian Rajiv Gandhi Stadium Mualpui a Sipai Lak Runpui buatsaih a ni dawn a, hetah Pawl 12 Entry hrang hrang – Soldier(Clerk); Soldier (Store Keeper); Soldier (Inventory Management); Soldier(Technical) leh Soldier(Nursing Assistant) a intlar tumte tan Army Recruiting Office candidate-te Document endikna lailawk, Preliminary Screening of Documents chu Central YMA Hall, Tuikhuahtlang-ah December ni 12 zing dar 11:00 AM leh chawhnu dar 2:00 PM inkarah a buatsaih dawn.

Soldier (Clerk); Soldier (Store Keeper); Soldier (Inventory Management); Soldier(Technical) leh Soldier(Nursing Assistant) intlar tumte chu January ni 15, 1991 leh 15 July, 1996 inkara piang an ni tur a ni a, taksa san lamah 160 cm tal a nih a ngaih bakah an awm len zawng chu 77 cm a ni tur a ni.

Soldier (Clerk); Soldier (Store Keeper); Soldier (Inventory Management) atan zirna lamah Pawl 12 pass an nih a ngaiin English leh Mathematics/Accounts/Book Keeping emaw ah 40 percent tal hmu leh a belkhawm a 50 percent tal an hmuh a ngai bawk a ni.

Soldier (Technical) tan zirna lamah Pawl 12 pass (Science- Physics, Chemistry leh Mathematics la kawp) an nih a ngai a, percentage lamah bithliah a awm lo ve thung a ni.

Soldier(Nursing Assistant) atan zirna lamah Pawl 12 pass (Science- Physics, Chemistry leh Biology la kawp) an nih a ngai a, subject tinah leh English ah te 40 percent tal hmu leh a belkhawm a 50 percent tal an hmuh a ngai bawk a ni.

Sipai Lak Runpui hunah document lamah harsatna an tawh loh nan he Screening hi buatsaih anih vangin intlar tumte chu an document neih ang ang (Pawl 10 leh Pawl 12 marksheet leh admit card te telin) kenga endik tir turin ARO chuan a intlar tumte chu a ngen.