Mizoram sawrkar nen thawhdunna thuthlung (MoU) an ziahfel hnu in vawiin khan Sir Ratan Tata Trust Secretary & Chief Accountant Pu Burziz S Taraporevala leh a hote chuan Thenzawl an tlawh.

Sir Ratan Tata Trust team hian Thenzawla AH&Vety Fodder Farm leh PIGFED Base Pig Breeding farm te tlawhin an hnathawh dan te leh harsatna an tawh te an zirchiang a, project tha tak awm tawh sa anih tur ang thawkchhuak theilova a awm chu a uihawm an tih thu sawiin, hlawk zawka hmalak chhunzawm anih theih dan tur kawng ngaihtuah vat tula an hriat thu leh tihtheih an neih leh neihloh an lo zirchian ve dawn thu an sawi bawk a ni.

Thenzawlah hian Navajbai Ratan Tata Trust (NRTT) hnuaia Pig Breeding Intervention Project kaltlanga vawkvulh tanpuina an pek te kawmin an hmalakna te a hmunah an ensak nghal a, Pu Burziz chuan Mizoram Sawrkar nen thawhdunna thuthlung an ziahfel hnu ah amah ngeiin mipuite rilru sukthlek hriatchian a duh vangin Thenzawla an beneficiary te pawh chu tlawh anih thu a sawi a, ruahmanna thar kalpui anih dawn thu leh vawkvulh bakah hlawk zawka sumchang thlai leh theirah tharchhuah te, zirna tihhmasawnna te, faina leh hriselna bakah mihring khawsak phung hrim hrim chawikan kawngahte pawh hma an lak dawn thu sawiin, NLUP hnuaia hmalakna te awmze nei zawk leh chak lehzuala kalpui anih theih nan an thiamna leh theihna te thahnemngai takin an hmang dawn a ni a ti bawk.

Navajbai Ratan Tata Trust (NRTT) hnuaia vawk vulha eizawngte tanpuina project kaltlang hian Serchhip District ah khaw pathum Thenzawl, Thenzawl Vengthar leh Buangpui ah te hma lak niin chhungkaw 75 hnenah tanpuina pek an ni a, Project period hi kum thum (May 1, 2013 – April 31, 2016) niin tanpuina sum pekchhuah zat hi Rs. 31,79,000 /- a ni a, implementing agency atan Cod Nerc (NGO) hman a ni.

Sir Ratan Tata Trust team hian Thenzawl an tlawh hnu hian Serchhip ah kir lehin Serchhip District Bawrhsap Pi Juhi Mukherjee, IAS chu a chenna In ah an hmu a, bawrhsap hian chhunchaw a lo buatsaih sak a ni. Bawrhsap hian Sir Ratan Tata Trust team in serchhip District an tlawh chu lawmawm a tih thu sawiin thawhhona tha tak an neih ngei a beisei thu a sawi a, Serchhip District chhunga khaw pahnih lai mai Lok Sabha MP leh Rajya Sabha MP ten Model Village a siam tura an thlan avangin nasa leh zuala tan lak a ngai a, Corporate mithiamte tanpuina leh finchhuahna an mamawh nasa hle dawn a ni a ti a, Pu Burziz-a chuan Serchhip District chhunga hma lak an tum dan te pawh Bawrhsap hi hrilhfiahin mamawhna ah theihtawp chhuahsak an inhuam thu leh an inhawn reng thu in a chhang a ni.

Sir Ratan Tata Trust team hi nizan khan Serchhip ah an riak a, Thenzawlah hian Pu Lalhmuakliana, MCS, SDO (C), Thenzawl leh Pu Andrew H. Lalremruata, MIS, DIPRO/Media Officer, NLUP Serchhip District ten tawiawmin vawiin tlai khan Aizawl panin an kir leh a ni.

Attachment

  • Loading attachment...