2087/2025-2026

Aizawl, the 11th September, 2025: State Institute for Rural Development and Panchayati Raj (SIRD & PR), Durtlang Leitan chuan Aibawk, Tlangnuam leh East Lungdar RD Block hnuaia VC thlan tharte tan 'General Orientation Training for Village Councils' tih thupui hmangin ni 4 (September ni 9-12, 2025) chhung awh training a buatsaih.

Training hawnna puala hun hmanah Pu R. Lalremsanga, Director, SIRD&PR Mizoram chuan VC te chu khawtlang hmasawn nana sulsutu pawimawh tak an nih thu sawiin, an hmalakna reng rengah dik leh langtlang taka hna thawk turin a fuih a. Sawrkar thuchhuak hrang hrangte ngai pawimawh turin a chah bawk.

Aibawk leh Tlangnuam RD Block hnuaia VC te pual hian SIRD&PR, Durtlang Leitanah training kalpui niin, Dr. Khawlsiamthanga, Khawlhring, Associate Professor, SIRD&PR leh Dr. Lalhruaitluangi Sailo, Senior Core Faculty, SIRD&PR te chu Course Director an ni a. He hunah hian Aibawk RD Block atangin VC member 37 leh Tlangnuam RD Block atangin VC member 26, an vaiin VC member 63 an tel a ni.

Hemi rual vek hian East Lungdar RD Block huamchhunga VC member thlan thar 26 te tan District Panchayat Resource Center, Serchhipah Course Director Dr. Khuangthansanga Pakhuangte, Associate Professor, SIRD&PR hovin 'General Orientation Training for Village Councils' training neih a ni bawk.

Ni 4 chhung awh training kaltlang hian VC member thlan tharte chu VC Act 2025, MGNREGS, GPDP leh Record & Account vawn dan chungchang SIRD&PR Faculty leh RGSA Faculty te'n an zirtir thin a ni.