Vawiin chawhnu dar 2:00 khan Serchhip Hmar Veng YMA Hall-ah UD&PA buatsaih SJSRY kaltlanga BPL member Furniture Workshop, Puan Thui(Tailoring) leh Handicraft zir chhuak mi 65 te hnenah Certificate leh an hmanraw mamawh te hlan an ni a, he inkhawm hi District Bawrhsap Pi Juhi Mukherjee, IAS chuan khuallian niin a hmanpui.

District Bawrhsap chuan Mizoram sawrkarin thalai rualte tan kut themthiamna lam zirna tura ruahmanna fel tak a siam hi a lawmawm hle a ni a ti a, training chhuakte bul tan nan bank loan te pawh lak theih a nih thu leh hlawhtlinpui tum tak tak chuan a tha hle a ni a ti a, mahse, a rulh leh lam erawh kan ngaihthah tur a ni lo a ti a, training chhuakte chu an thil zirte hmang tangkai theuh tur leh hlawhtlinpui theuh turin duhsakna a hlan bawk a ni.

SJSRY kaltlanga BPL member ten eizawnna kawng an dap theihna tur kawng kawhhmuhna tur atana training buatsaih hi Furniture Workshop leh Puan Thui atan hian thla ruk course a ni a, Handicraft atan thla thum course a ni. Tun tumah hian Furniture Workshop-ah hian mipa 12 in ziak lutin training centre 5 ah an sem darh a, Tailoring-ah hmeichhia 39 in ziak lutin training centre 4 ah sem darh an ni. Handicraft-ah mipa 6 leh hmeichhia 8 an in ziak lut a, hlawhtling takin training an zo thei a ni.

Trainee ten thla tin an stipend dawn tur Rs. 500 chu Department in dah khawl sakin, Puan Thui zirte tan puanthui khawl lei sak an ni a, an training chhungin an hmang nghal a ni. Chutiang bawkin Furniture trainingte pawh Electric Randa leh Design khawl lei sak an ni bawk a, hengte hi vawiin hian trainee te hnenah hlan nghal an ni. SJSRY, UD&PA Department hnuaiah hian Tailoring-ah mi 99, Furniture-ah mi 33 leh Handicraft-ah mi 21 ten training an chhuak tawh a ni.

Vawiina inkhawm hi Pu S.T Lalhmingmawia, DPO (SJSRY) Serchhip Distrcict in a kaihruai a ni.