Nimin tlai ah khan Security Sector, Skill Development Council, New Delhi aiawh a Mizoram rawn tlawhtu official te chuan Governor Lt.Gen (Rtd.) Nirbhay Sharma chu a chenna, Raj Bhavan ah Mizo thalai te thiamthil zirtirna chungchangah an kawm a.

Skill Development Council hotulian pathum, Maj. Gen. Kuldip Singh, Security Sector, Brig. P.K.Sanyal, Regional Head(East) leh Col. U.S. Rathore, Principal, S&QA te chuan Mizoram an rawn tlawh chhan chu Mizo thalai tam tak, chhan hrang hrang vanga zirna sang chhunzawm thei lo te tana kawng kawng hmuh leh training tur ruahman a nih thu an sawi a. A bik tak in company zawng zawng deuh thaw mamawh, Security Skill traning duh thalai an awm em tih an rawn enfiah thu an tar lang. Governor chuan Mizo thalai tam zawk hna hmu lo te chu lehkha thiam an nih tho thu a sawi a, zirna sang zawk zir theilo te nen security skill training huang pawn thlenga an zir thiam theih tur ngaihtuah sak turin Skill Development Council hotute hi a lo kawhhmuh a. Mizoram sawrkar hnuai a Mizoram Youth Commission leh Thalai te tana tha tam tak lo seng tawh CYMA te nen dawhkan khat kil hova ruahmanna neih a hlawk thlak bera a rin thu a lo hrilh a ni.

Governor ruahmanna in tukin ah khan Hotel Regency ah Skill Development Council Official te hian MYC Chairman Pu T.Sangkunga, MLA, MYC Official te, CYMA hruaitute leh PRO to Governor te an kawm a. An inkawmna ah hian MYC leh CYMA te chuan an hmalak tawhna te leh an thlen chin bakah an harsatna tawh te an sawi chhuak a. Training chhuak tam tak te chuan Hindi an thiam loh avanga harsatna an tawh thu sawiin Soft Skills Training telna Skill Training a pawimawh ber tur thu an tarlang a ni. Skill Development Council official te chuan Mizoram ah Training Centres 2 din rem tiin CYMA leh MYC te chu Vocational Training Providers(VTP) an nih theih dan kawng kawh hmuh in hmalak pui an tiam a. Skill Training Sector hrang 37 te kawh hmuh in Mizo thalai te tana tha ber tur thlang chhuak turin thurawn an pe a ni.

He inkawm ho na hian CYMA hruaitute chuan Mizo thalai tam zawk te chu mahni in leh lo ngaih vanga hnathawhna hmun atanga Mizoram pan leh mai thin an nih avangin state chhunga eizawnna atana hman theih thiamna ziritr ni se an duh thu a sawi a. He rilru put hmang hi Hindi thiamna thalai tam zawk in an neih hunah erawh a danglam deuhva an rin thu sawiin Mizoram thalai ten Soft skill training an mamawh thu an tarlang a ni. Security Sector, Skill Development Council Official te chuan Mizo thalai te tan chuan handicraft, Hospitality, Health Care, automobile, Construction leh Capital goods, garment design and apparel making, logistics, sports, security leh electronics and electrical a hlawk a an rin thu sawi a. Certification leh assessing pawh rawn tih sakin in training petu tur training rawn pek thleng in an inhuam thu an sawi a ni. An Certificate pek hniamber, entry level hi Level 4 a ni a. Level 4 trained te hian India ram chhung khawilai ah pawh hna an hmu thei a, an hlawh pawh certificate nei lo aiin 75% a sang zawka chhawr an ni ang an ti. Phai lam atanga VTP te chah chho lovin training pek man ah hlawkna tel ve turin CYMA leh MYC chu VTP atan kawng zawn pui an inhuam thu an tarlang bawk a ni.