Vawiin khan Pu Lalrinliana Sailo, MLA chuan Mizoram Youth Commission leh LE&IT Department tangkawpin IQST (Institute for Quality Skill Training), Guwahati-a thla li chhung training turin thalai hmeichhe 30 rual DRDA Office kawtah thlahna hun hmangin a vailiam nghal a ni.

Pu Lalrinliana Sailo chuan thiamna chhawr tlak leh hna hmuh mai theihna tura training Mizo thalaite tana ruahmanna siamsak kawngah MYC leh LE&IT Department-te hnathawh chu lawmawm a tih thu a sawi a. An training-na tur course hrang hrangte hi ram thang zelin a mamawh ken telte zing ami a ni tiin, kan ramah a la pawimawh zel dan a ni, a ti a. Training-a kal turte chu chhel takin zir turin leh, anmahni leh an chhungte tan mai nilo, ram tana rah tha chhuah thei tura bei turin Pu Lalrinliana Sailo a chah bawk a ni.

MYC Chairman Pu T. Sangkunga chuan kumin chhungin training tur mi 1200 chuang tirhchhuah an nih tawh thu sawiin, a aia tam zawk pawh an la kal a beisei thu a sawi a. Heng hmalaknate hi a hlawhtlinna chu zirlaite ah a innghat thui hle a ni tiin, hlawhtlin tum ngeia zir turin a fuih bawk.

Vawiin thlahna hunah hian Dr. J.T. Vanlalngheta, Secretary, MYC; Pu Francis Lianmawia, Assistant Welfare Commissioner, Workers’ Welfare Board (LE&IT Dept.) leh Pu Lalsawmzuala, Superintendent, MYC-te an tel a. Training turte hruaithla tur hian an zirna hmun tur IQST atangin aiawh an lo kal a ni.

Ni 23 August, 2014 (Ningani) khan NIPS, Kolkata-a thla li (4) chhung training turin thalai 43 rual tirhchhuah an lo ni tawh a. September ni 1 hian NIAS leh O2, Hyderabad a zir turin thalai za rual vel thlah an ni leh ang.