Nimin( Ni 24.9.2019) khan Pu Lalchhandama Ralte School Education Minister chuan Pachhunga University College-ah UGC Community College a hawng.
      
Community College hawnna PUC seminar Hall a neihah hian thusawiin Minister chuan Skill hmang tangkai ram apiangin hma an sawn a, India pawhin Development-ah hma a sawn zel a, skill Centre ni turin a inbuatsaih mek a ni a ti. Pachhunga University College a skill development course chi hrang hrang buatsaih tur chu lawmawm tiin course hrang hrang kalpui zel turin sorkar chu a inhawng hle tih a sawi bawk.
    
Minister chuan Themthiamna chi hrang hrang hi a buaipuitu chu lehkha zir sang lem lote an ni fo thin a, lehkhathiam zingah themthiamna nei tha, certificate course nei nih chu a tangkai hle dawn a ni, a ti a. PUC ah scheme tha tak tak hawn a ni chu zirlaite vanneihna a ni tih sawiin he hun tha hi hmang tangkai turin zirlai kalkhawmte chu a fuih a ni. Minister chuan Hlawhtling turin taima, teirei peih, tuar chhel nih a ngai thin a ni a ti a. Minister hian Zirlaite chu hma lam thlirnaah tum ram neia an kal phawt chuan hlawhtlinna chu an hmaah banphakin a awm tih hre turin a chah a, community college ah skill develop a, level 4,5,6,7 a lo awm tur hian sorkar pawh a tihphur hle a ni a ti bawk.
     
Dr Vanramliana course coordinator chuan community college kalpui dan tur a sawifiah a, zirlaite skill pek chu an tum ber a ni tih a sawi a. Certificate course hrang hrang- Mizo traditional handicraft, vermicompost technology, House keeping, Repair & Maintenance of Power supply, inverter & UPS te zir theih anih thu te, zirlaite chuan college chawlh chhungin  practical an ti dawn a, stipend pawh thla khatah Rs 1000 an hmu thei dawn tih a sawi bawk.
    
Dr Tawnenga Principal chuan Pachhunga college ah hian zirtirtu 130, non-teaching staff 100 vel, regular staff 104 an awm a, zirlai 2500 vel an awm mek tih a sawi a, NAAC accreditation ah A+ an ni mek a, research scholar pawh  6 an awm a, management zirlai 40 an awm a, degree course  result chhuak hnuhnung berah topper 23 awm theihnaah PUC hian 19 an hauh tih a sawi bawk.
  
Pachhunga University College-a UGC Community College hawnna inkhawmah hian Principal leh faculty te bakah course hrang hranga an thawhpuite leh zirlaite an tel a ni.