2101/2022-2023

Champhai, the 28th September, 2022: Block Resource Centre (BRC), Champhai Block bultumin Samagra Shiksha hnuaia School Management Committee (SMC) leh School Management & Development Committee (SMDC) te tana Orientation Training buatsaih chu vawiin khan zawhfel a ni.

DEO Champhai Pu TT Laltanpuia, DPC, Samagra Shiksha ni bawk hnen atangin zirtirtute tihtur leh an mawhphurhna kawng hrang hrang ngaihthlak niin zirtirtute hnapui ber chu zirlaite zirtir a nih mai bakah zirlaite leh nu leh pate kawng tha leh dik kawhhmuhtu an nih thu a sawi a. Zirlaite hriatchian a tul thu te, class room-a zirtirna an pek dan chungchang te, sikul leh a vel vawnfai chungchanga thu pawimawh tak tak a hnen atang hian ngaihthlak a ni a. Zirtirtute chu zirlai naupangte hma hun siamtu pawimawh tak an nih thu a sawi bawk.

Covid-19 avangin hun rei tak chhung Sikul kal mumal theih a nih loh avangin State Project Director, Samagra Shiksha Mizoram chuan SMC leh SMDC te tan intuaitharna hun neih thaa a hriat avangin District tinah hma la turin hriattirna a tichhuak a, chumi bawhzui chuan Champhaiah pawh District Education Committee Champhai-in SMC leh SMDC tihchak tul a ti a, DEC thurel bawhzuiin he hun hi buatsaih a ni.

Training hian a tum ber chu SMC leh SMDC te tihchak thar a ni a, an mawhphurhna leh an tih turte hriat thar tir chu a tum ber a ni. Training an neih chhung hian zirna hmasawnna tur leh zirna tha awmna tura ruahmanna tha leh fel tak siam a, bawhzui leh tihhlawhtlin a nih theihna tur kawng hrang hrang zirho a ni.

Orientation training hi Khawbung Block tan BRC Training Hall-ah buatsaih a lo ni tawh bawk a ni.