Mizoram Police chuan April ni 6 a Social Media a Vairengte a Police Duty ten hnamdang lo lut tur te an body temperature lo ensak a awlsam taka an luhtir anga thu diklo thehdarhtu an man chungchangah a hnuai a mi ang hian thuchhuah an siam:
Dt. 6.4.2020 khan Social Media platform Facebook group hrang hrang "Mizo Special Report" leh a dangteah mi pakhat chuan thu belhchian dawl lo tak post siam in, hrilêng lo luhna kawngka ber Vairengte-ah chuan Daktawr pawh ni lo, Police Duty pangngaite'n kan rama vai lo lut tur kha, a enfiahna hmangin an temperature sân leh sân loh an lo en a. Tichuan, awlsam takin kan ramah an lo lut ta zung zung mai, tiin a leikuai thei ang berin "Eng nge inkharkhipa inhrem a tulna?" tiin mipui rilru ti chiai thei zawng leh he hrileng darh zel tur venna kawnga Sorkar hmalaknate thu belh chian dawl lo hmangin sawiselna thu nasa tak in a post a ni.
He thu hi Social media platform hrang hrang Whatsapp group-ah te post darh a niin, Sorkar chuan a ngai thutak hle a. Thu dik lo hul hual niin Vairengte checkgate-ah hian Screening neih tirh Dt.12.3.2020 atangin Police duty ten Screening test hna an thawk ngailo hrim hrim a. Hemi chungchangah hian Dt.6.4.2020 khan Vairengte Police Station-ah Medical Officer, CHC Vairengte chuan FIR-a thehlut nghal a ni.
He post siamtu hi Lunglei mi a nih avangin Lunglei PS ah case hi transfer nghal niin, Chief Judicial Magistrate, Lunglei ah Cognizance lak a nih hnu in Lunglei PS C/No.32/2020 Dt. 7.4.2020 u/s 505 (1)(b) IPC register a ni a, amah pawh man nghal a ni a, Court-ah thawn nghal a ni.
Mipui rilru a diklo zawnga hruai thei thu dik tawklo thehdarh hian nghawng thalo tak a nei thei a, mipui te tithlabar a, timangang thei thu post mai mai lo turin mipuite kan ngen nawn leh a. Hetiang thu diklo thehdarhtu hi Mizoram Police te chuan chhuichhuakin an man zel dawn a ni.
