Parliamentary Secretary for Tourism, FCS&CA etc. leh Champhai North Bialtu MLA ni bawk Pu TT Zothansanga chuan tun laiin internet, TV leh social media avangin kan buai phah hle thin a; hei hi zirna leh hna an zawnna kawngah min dangtu a ni tur a ni lo, a ti. Heng thu hi vawiina Hnahlan Community Hall-ah Career Awareness Campaign neih naah a sawi a ni a. “Tunlai thalai ten lehkha kan chhiar tlem tawh hle a, engkim hriat vek chu tullo mahse kan chhiar chhun erawh tangkai se, kan hriat chhun hi eizawnna tham ni rawh se,” a ti a ni.
Parliamentary Secretary tunlaiah Sorkar hna a vang telh telh a, Lehkhathiam hna hmulo kan tam telh telh bawk a; Hna sang tak neih tumin national leh state level competitive exam kan bei nasa hle a, a beitu kan tam em avangin thiam viau vek mah ila post in a daih loh avangin tlin vek a theihloh tih chu hria I la, sorkar hna bak hna tha tak tak dang a awm tih erawh hre tel bawk ila a tha, a ti a. Thalai kalkhawmte chu Mizoram chhung chauhva hna zawng lo turin a chah bawk. Tunlaiah hlawhtling turin thiam filawr nih a ngai tawh a. Mi aia zir tam a ngai a, mi thiam tan hna India rama a la tam a ni tiin, mi thiamthei aiin mi taima leh teirei peih mi an hlawhtling tam zawk thu a sawi a. Thalaite zingah kan mi ngaihsan zawngte leh rilru sutthlek dan te her rem a, exam a titha te leh lehkhathiamte ngaihsan a tul thu a sawi a ni.
Pu TT Zothansanga chuan Tualcheng leh Rabung inkar kawng chu NEC priority 2015-2016 ah pawm a nih thu leh, sorkar kum lo awm leh turah chuan kawng laih tan theih beisei a nih thu a sawi lang bawk a. Reiloteah Hnahlan Grape man leh loan lak te rulh theih beisei a nih thu sawiin Hnahlan grape chingtutute a thlamuan bawk.
Vawiin hunah hi Hnahlan Students Union in an buatsaih niin, chawhma lamah rorelna neih a ni a. Career Awareness Campaign ah hian resource person shrang hrang sawm ten high school zirlai, zirna sang zawk zir duh te tana hriat tur field hrang hrang chungchang leh hriattur pawimawh dangte an sawifiah a. Mental Health Awareness chungchang zirhona neih a ni bawk.
Parliamentary Secretary Pu TT Zothansanga chuan Hnahlan bial bikah HSLC pass thate tan lawmman - Top Ten a tling hnenah Rs. 10,000 , Distinction a pass hnenah Rs. 5000 leh First Division-a pass te hnenah Rs. 3,000 pek an nih tur thu a vawiin hian a tarlang bawk.
