No.6579/2020-2021
COVID-19 hri kaite enkawlna hmun atanga discharge dan sawrkarin a ruahman chungchangah Social Media-a voice message hmanga thubelhchian dawllo thehdarh a nih avangin health & family Welfare Department, Government of Mizoram chuan a hnuaia tarlan ang hian thil awmzia a sawifiah.
Mizoram sawrkar hian Covid-19 vei te Discharge Policy hi Ni 25.9.2020 khan MoHFW guidelines siam thar behchhan in CCC/DCHC/DCH/Home Isolation Discharge Policy thar hman tur Notification a chhuah a, hemi Notification thar ah chuan Positive te inenkawlna hmuna an awm atanga ni 14 hnu a RT-PCR hmanga repeat test negative te chhuahtir thin kha ni 10 hnu ah Rapid Antigen Test (RAgT) negative te chu chhuah tir theih a ni tih a rawn ni ta a, Social Media a rawn thehdarhtu hian RAgT test negative hi a rin loh avangin hetianga rawn ti mai hi a nih a rinawm.
Ni 31.10.2020 khan Sawrkar chuan Revised Discharge Protocol siam thar lehin, Positive te chu anmahni enkawlna hmun (CCC/DCHC/DCH/Home Isolation) ah ni 10 an awm hnu a RAgT test neih a negative te chu discharge tur an ni ang a, discharge an nih hnu ah pawh ni 7 chhung in lamah mahni dinhmun chik taka in en chunga inkhung hrang chhun zawm turin chhuahtir an ni ang tih a ni ta thung a. He Revised Discharge Protocol for COVID-19 patient hi tute emaw avanga revised ni lovin ICMR in discharge policy a siam ang dung zuiin, mipuite him zawk nan leh kan ram dinhmun mil ang zelin a revised mai zawk a ni.
ICMR Discharge Policy ah chuan symptom nei nasa lo (mild symptomatic) te chu ni 10 an awm chhung tawp lam, ni 3 chhung (ni 7 – 10) a khawsik a awm loh chuan Test leh hran ngai tawh lova chhuahtir (discharge) tur an ni a tih laiin, Mizoram sawrkar chuan mipuite him zawk nan Rapid Antigen Test tih leh ngei ngei tur a ti a, chumi a Negative te chauh a chhuahtir thin a ni. Rapid Antigen Test a la positive te chu vawiin thleng hian tumah chhuahtir an la awm lova, RAgT test hmanga Negative chhuahtir tawh te zingah vawiin ni thleng hian mi tumah midang kaichhawn leh report sawrkarin a la dawng lo.
