Social Welfare Department Director Pu Vanchungnunga chu Superannuation Pension-a tun thla tawpa a chawl tawh dawn avangin vawiin khan Social Welfare Conference Hall, Laipuitlangah thlahna an nei a, Zoram hmun tina CDPO, DSWO leh CO te an kim hle. He thlahna inkhawmah hian Social Welfare Minister Pu P.C.Lalthanliana leh Social Welfare Secretary Pi B.Sairengpuii te pawhin an telpui a ni.

Director thlahna inkhawmah hian Minister Pu P.C.Lalthanliana chuan mimal tak pawha a uizia sawiin, kum khat leh thla khat an thawh dun chhunga kawng tam taka a fin chhuahna leh a thurawnte a chhawr tangkai zia a sawi a. Department kal zelna atana kawng fai leh kawng ngil a lo sah kuak sak tawh chu, Officer leh Staff thawk chhunzawm zel turte pawhin ding lam leh vei lama ti kawitu nilova Department  hmingtha leh mi tanpui thintu an nihna chu chhunzawm zel turin a chah in duhsakna a hlan nghal a ni.

He inthlahna inkhawmah hian Department hnuaia IV Grade pathum pawh thlah tel nghal niin Minister hian pocket money a pai theuh hlawm a ni.