6/2022-2023
Siaha, the 1st April, 2022: Social Welfare Minister Dr. K. Beichhua chuan vawiin khan Siaha khawpuia sorkar hmalakna leh hmachhawp hrang hrangte a hmunah tlawhkualin a enfiah.

Naupang kumtlinglo, Dan bawhchhiatna neite enkawlna tur, Observation Home sakna tur hmun Siaha Meisatla thlanga Remand Home dinna hlui tlawhin Department engineer te leh hna enkawltu turte nen hnathawh dan turte an sawiho nghal.

Women & Child Development Department chuan Observation Home, Siaha sakna atan cheng nuai Rs.87.45/- a ruahman a, hna enkawtu tur thlan tawh niin, Building pakhat 168.15 square metre-a zau leh Fencing metre 187-a thui siam tur a ni. Karleh lam atang hna tan theih nghal beisei a ni.

Social Welfare Minister Dr. K. Beichhua chuan District Social Welfare leh CDPO Office tur, Building sak mek a tlawh bawk a, he project hi Integrated Tribal Development Agency building tih niin, ground floor leh 1st Floor sak mek a ni a, a chung lama sak chhunzawm nan Ministry of Tribal Affairs atangin Cheng nuai Rs.100/- hmuh a nih tawh thu Dr. K. Beichhua chuan a tarlang. A building hi ground floor bakah a chungah floor 4 tura ruahman phawt a ni a, a chung lama sak chhunzawm zel theih tura ruahman a ni.

Social Welfare Minister Dr. K. Beichhua chuan Cheng nuai Rs. 560/- senna tur, Siaha Vaihpi Community Hall, sak mek a tlawh bawk a, contractor te hnathawh chu tha a tih thu leh an hnathawh chak a tih thu a sawi a, harsatna an neih chuan a hnenah thlen a, lo bawhzuisak zel a huam thu a hrilh nghal.

Social Welfare Minister chuan Social Welfare Department enkawl, Vocational Training Centre (VTC) Siaha a tlawh nghal bawk. VTC building te hi a hlui tawh avangin vuak thiata a thara sak turin ruahmanna siam an tum thu Dr. K. Beichhua chuan a sawi.
Siaha VTC ah hian Puanthui leh Electronic zirna kalpui mek a ni a, tunah hian zirlai 26 an awm mek a ni. VTC a zirna an pek hi kum khat chhung atan a ni a, tuna zirlaite hian nikum June thla atangin bul an tan a ni.

Dr.K.Beichhua hi Department engineer te, official te leh party miten an tawiawm a ni.