2003/2022-2023
Aizawl the 21st September 2022 : Vawiin Alzheimer’s Day pualin Alzheimer’s & Related Disorders Society of India (ARDSI) Mizoram Chapter chuan Aizawl Chanmari Veng atangin Millennium Centre thleng Memory Walk an buatsaih a. He hunah hian Social Welfare & Tribal Affairs Minister Dr.K.Beichhua chu khuallian a ni.

ARDSI, Mizoram Chapter-in Alzeheimer’s Day puala hun an buatsaih chu lawmawm tiin Minister Dr K.Beichhua chuan Alzheimer natna chungchang hriatzauna kawngah a tangkai a beisei thu a sawi a, memory walk a tel zawng zawng te chu mi dangte zirtirtu ni theuh turin a chah a ni. Alzheimer’s chu thluak lam natna, tute pawhin an vei theih, keimahni leh kan chhungkua theuha thleng thei a ni, a ti a. A tihdamna awm lo mahse a enkawl dan kawngah te, chhungkua leh thenawm khawveng ten hriatthiamna thuk zawk kan lo neih theihna atana te a inzirtir a pawimawh a ni, Social Welfare Minister chuan a ti.

Alzheimer natna hi Mizoramah chuan thluak sawng natna tih a ni a. A tihdamna awm lo mahse a veite enkawl danah, chhungkua, thenawm khawvengte leh khawtlang hriatthiamna, enkawl thiamna leh intawiawm tawnna chu thil tul tak a nih avangin a ngaihventu pawl ARDSI hi din a ni a. Mizoramah chuan he pawl hi September 21, 2015 khan din a ni. He pawl hian Alzheimer natna sawihona leh a vei enkawltute zirtirna hun te a buatsaih thin a. A veite leh an dinhmun survey a nei mek a ni.

Vawiina Alzheimer’s Day pual hian he natna vei mek te leh he natna vei boral tawh te hriatrengna atan Memory Walk buatsaih a ni a. Millennium Centre kawta programme tawi buatsaihah Dr Daniel Chianghnuna’n kalkhawmte lawmna thu a sawi a, an President Pu Vanneihtluanga’n lawmthu sawiin hun hnung a khar a ni.