No.6270/2020-2021

Vawiin khan Social Welfare Minister Dr.K.Beichhua chuan SAD Conference Hall, MINECO-ah drugs dona beihpui -Nasha Mukt Bharat Campaign (Drugs Free India Campaign) Aizawl District leh drugs dona atana social media campaign a hawng. 

Minister Dr.K.Beichhua chuan Mizoramah thalai tam tak drugs bawihah an tang a, chhungkaw tam takin an buaipui a, a la fihlim te hian an chhungkua a luhchilh ve lohna turin nasa taka tan an lak a ngai, a ti a. Kum 2019 khan sawrkar laipui Ministry of Social Justice & Empowerment leh AIIMS, New Delhi tangkawp chuan India ram pumah ruihhlo zirchianna ‘Magnitude of substance use in India 2019’ neih niin Mizoram chu India ram pumah opiod kaihhnawih - heroin leh a dangte hmangsual nasa ber kan ni, a ti. Drugs bawiha tang mek te chhanchhuak tur leh a fihlim ten an tih ve lohna turin sawrkar, kohhran, tlawmngai pawl, chhungkua leh mimal tin ten mawh kan phur a ni, Social Welfare Minister chuan, a ti a. Ruihhlo dona beihpui Nasha Mukt Bharat Campaign hmang hian kan rama ruihhlo dona atana sawrkar hmalakna te theihtawpa lo tanpuia, thlawp tlat turin Mizoram mipuite a sawm a ni. 

Ministry of Social Justice & Empowerment in zirchianna a neih hnuah India rama ruihhlo hluarna district 272 thlan chhuah a ni a. Heng district thlanchhuah zingah Mizorama District pathum - Aizawl, Kolasib leh Champhai an tel a, vawiin programme-ah hian Aizawl District huamchhunga hmalakna tur hawnna hun neih a ni. He campaign hi India ram pumah Augus ni 15, 2020 khan hawn a ni a, March ni 31, 2021 thleng kalpui a ni ang. District tinah peer voluteers sawmnga (50) zel thlanchhuah tur niin ruihhlo hmansual leh a kaihhnawih chungchang zirtirna pek an ni ang a. Anni hian rawlthar/tleirawlte ruihhlo tilo tura zirtirin, tanpui ngai an nih chuan tanpuina hmun hrilhhriata hruaithlen te, a tul anga counseling pek leh treatment centre te nea thawhho, Peer Volunteers Club din te, thalaite ruihhlo laka an fihlim theih nana programme te buatsaihin hma an la dawn a ni. 

National Drug Survey 2019-a a lan danin India leh Mizoram dinhmun chu hetiang hi a ni:-

Vawiin programme Aizawl DC Pu R.Lalramnghaka kaihhruaiah hian Social Welfare Minister Dr.K.Beichhua chuan drugs dona social media campaign a tlangzarh nghal bawk a. Radio jingle, animation, documentary, narration, short play leh billboard te an tarchhuak dawn a ni.