629/2025-2026
Dated Aizawl: the 16 May 2025 : Nimin khan Social Welfare & Tribal Affairs, Women & Child Development Department changtu Minister, Pi Lalrinpuii chuan, kumin HSLC leh HSSLC result chhuak a mitdel zirlai hlawhtlinna chang Durtlang Special Blind School-a awmte chawimawina hun, Special Blind School Durtlang hmuna neih chu khuallian niin a hmanpui a, lawmpuina pawisafai Rs. 20000/ a hlan nghal bawk a ni.
Lawmpuina puala hun hmanah hian khuallian Social Welfare & Tribal Affairs, Women & Child Development Department Minister Pi Lalrinpuii chuan thusawiin, zirlaite chu tumna an neih phawt chuan kawng a awm tih hre reng turin a chah a. Sawrkar chuan rualbanlote hmakhua a ngai em em tih sawiin, sawrkar hna lak apiangahte pawh PWD quota chu hmun pawimawh tak changtu a ni tih a sawi a. Hlawhtlinna changtute thawhrimna piah lamah anmahni chher chhuaktute inpekna chu ropui a tih hle thu tarlangin, zirna chuan mihring nun kawng engkimah ngawhng a nei nasa em em a ni a ti a. Zirlai puitling chher chhuak thei tura tan la zel turin a fuih a. Zirlaite chu an hma hunah hlawhtlinna chang chho zel thei turin mahni inthunun theihna te, chin dan tha neih te, an thiltih reng renga inpekna bakah hun vawn that te chu ngaipawimawh zel turin a chah nghal bawk a ni.
Lawmpuina hun hi Pu C. Lalhlira, Samaritan Associations for the Blind President chuan kaihruaiin, kalkhawmte lo lawmna thu a sawi a. Durtlang Blind Hostel-a zirlai naupangte atangin special items beng titlai tak takte ngaihthlak niin, Pu RK. Vanlalringa, executive secretary, SAB hnen atangin report ngaihthlak a ni a. Hemi zawh hian a duh apiangte tana thusawina hun hawn a ni a. DR. C. Biakmawia, Senior advisor chuan lawmthu sawiin hun hi a khar a ni.
Durtlang Special Blind School hi Samaritan Association for the Blind ten kum 2001 May ni khat khan an din a. Kumin HSLC leh HSSLC result chhuakah khan candidate pakhat ve ve neiin, hlawhtlinna an chang ve ve a ni. He school atang hian mi 34-in HSLC zo tawhin, Sorkar hnathawk 14 vel an awm tawh a. Kumin (2025) hian he school-a inziak lut zawng zawng chu Primary-ah mi 16, Middle School-ah mi 11 leh High School-ah mi 6- an zavaiin mi 33 an ni a. Zirlai naupangte hi Mizoram bakah Assam, Tripura, Manipur leh Myanmar atanga lo kalte pawh an awm a ni.
