1655/2021-2025

Dated Aizawl:  the 20th August, 2024: Nimin tlai dar 4:30 khan Geriatric Caregiver RIPANS hnuaia training chhuak mi 8 (pariat) Japan-a kal thei tura thlan chhuahte chu Social Welfare & Tribal Affairs, Women & Child Development Chamber atangin Department changtu Minister Pi Lalrinpuii chuan a vai liam. Minister hi Pi Lalzarmawii, Commissioner & Secretary, Pi Zonunthari, Joint Secretary, Dr. Lalhriatzuali Ralte, Director, SW&TA, Department Official-te, Pi Laldinpuii, Course Coordinator, RIPANS leh MUP hruaitute'n an tawiawm a ni.

He hunah hian Pi Lalrinpuii chuan thu sawiin, damdawi lama thiamna sang zelah, mihringte kan dam rei chhoh zel rualin, kum lama upate chu bawrhsawmnain a tlakbuak sam bik hle tih  sawiin, "Hei hi hriain Sawrkar laipui Ministry of Social Justice & Empowerment chuan scheme thar, Creation of pool of trained geriatric caregivers programme chu a rawn duang a ni", a ti a. Tute pawh hian upat hun kan la neih theuh dawn avangin, mahni chantur anga dah chung zelin upate, nu leh pa, pi leh pute duat tak leh hmangaih taka enkawl turin thalaite chu a chah nghal a ni.

Geriatric Caregivers (kum upa enkawltute) training hi Ministry of Social Justice & Empowerment hnuaia Scheme, Atal Vayo Abhyuday Yojana (AVYAY) Scheme hnuaia kalpui a ni a. Social Welfare and Tribal Affairs hi Nodal agency niin, RIPANS hi training centre a ni.

He short term course hi thla 3 chhung neih niin, heng mi 8-te hi National Skill Development Corporation (NSDC) hmalakna a kal tur an ni a, screening an paltlang hnuah Japan lama client/employer (anmahni ruaitu turte) interview an paltlang leh ang a, Delhi-ah Japanese Language course thla 9 chhungzir lehin chumi hnuah Japan lama tirh chhuah an ni ang.

RIPANS hian 1st batch-te chu train chhuak tawhin, anni hian Mizoram Geriartric Caregivers Association an din tawh a, a mamawh tan koh theih rengin an awm a ni. Tin, 2nd Batch hi ni August ni 12, 2024 khan class an tan pui a, seat tlem a la awm avangin dilna hun an hawng mek a, dil duhte chuan a rang lamin Directorate of Social Welfare & Tribal Affairs, Chaltlangah dilna theh luh theih a ni.