No.516/2020-2021

Vawiin khan Dr K Beichhua, Minister of State, Social Welfare Department chuan Jordan Centre, Sethawna hmalak chhunzawm dan tur endikin Polytechnic, Thingdawl Quarantine Facility a enkawlna kalpui mek te a tlawh nghal bawk a ni. Pu K Liantlinga, Vice Chairman, Social Rehabilitation Board, Pi Marli Vankung, Secretary, Social Welfare Department, Pi Ankita Chakravarty, Director,Social Welfare Department leh department-a hotu dangten Minister hi an tawiawm a, Kolasib DC Dr H Lalthlangliana, Dr Lalhlimpuia, CMO leh Quarantine Facility enkawltute nen inkawmna hun an hmang bawk a ni.

Minister Dr K Beichhua chuan Jordan Centre tihpuitlin nan sawrkarin hma a lak mek laiin Covid-19 avangin hma lakna chawlh tir lailawk a nih thu a sawi a. Inkharkhipna kalpui mek a nih lai a ruihhlo zawng a ramri kan, duty-ten an man khawm, Polytechnic Quarantine Facility-a khunghran te leh hmun hrang hrang a dahhran mek te enkawl zuina turin rang zawk a ruahmanna siam a ngaih thu a sawi a, Jordan Centre chu hemi atan hian a tul ang a hman turin hmalak a nih tur thu a sawi. Minister chuan Kolasib, Vairengte leh Bairabiah te inkharkhipna kalpui chhung hian ruihhlo vang a enkawl ngai engemaw zat an awm thu a sawi a, Jordan Centre chu thuam that a, dahhran hun hmang zo tawh te enkawl chhunzawm nan ruahman a nih tur thu a sawi. Dr K Beichhua chuan Polytechnic Quarantine Facility, Thingdawlah inkaihhruaina tha tak nen, Doctor-te enkawlna hnuai ah mumal tak a Kolasib District-a thuneituten Quarantine Facility-an kalpui chu fakawm a tih thu a sawi a, Polytechnic Thingdawl chu tun a enkawl lai te leh mamawhna avang a lo pantute enkawl chhunzawm an nih theih nan tihchangtlun a tul thu a sawi a, hemi atan hian SEDP hnuai a Social Rehabilaitation Board te pawh in thutkhawmna an neih vat tur thu a sawi a, Social welfare department leh Kolasib district lam a thuneitute pawh a tul ang a hma la turin a chah nghal bawk a ni.

Dr H Lalthlangliana, DC Kolasib chuan Quarantine Facility a dahhran te chu ramri kan a ruihhlo zawng an nih thu sawiin enkawlna pawh uluk tak a pek an nih thu a tarlang a. Nitin Doctor ten vawi 2 an endik ziah bak ah rilru lam a mithiam ten inkawmna hun an hmanpui thin thu te leh hunbi mumal tak neiin Pathian thu zirtirna hun siam thin a nih thu a sawi bawk a ni.

Polytechnic Quarantine Facility, Thingdawlah hian mi 105 an kawl mek a, an zing a mi 19 te chu hmeichhia an ni.