No.2083/2021-2022

Aizawl the 1st September, 2021 : Vawiin khan Women & Child Development hnuaia Scheme pawimawh tak pahnih Pohshan Abhiyaan leh Pradhan Mantri Matru Vandana Yojana(PMMVY) hnuaia ‘Rashtriya Poshan Maah (Nutrition Month)’ leh ‘Matru Vandana Saptah’ te hawnna hun Social Welfare Minister Dr. K.Beichhua an a hmang.

He hawnna hun hi Mizoram pumpui-ah Video Conferencing hmangin neih a ni a. Social Minister Dr. K. Beichhua chuan tun kum Rashtriya Poshan Maah leh Mantru Vandhana Saptah chhung hian Mizoram chhunga naupang chaklo bik (SAM Children) kan tihte enkawlna pek a, hma la nasa zual turte, Anemia (Nu naupai leh tleirawl a thisen tlakchhamna) a awm tawh loh nan kan line department te nen theihtawp chhuah lehzual turin he hawnna hun a chhimtute chu a sawm a. Heng bakah hian Nutri-Garden (Kan Wadi Kan Huan) siam-ah te hma la leh zual turin thawktute fuih tharna hun a hmang tel a, Mantru Vandhana Saptaah-ah pawh nu leh naute hrisel tha kan neih zel theih nan tan la lehzual turin chhimtute a chahbawk a ni.

Social Welfare Minister Dr. K. Beichhua chuan Ministry of Women & Child Development hnuaiah hian Women & Child Development, Government of Mizoram hi a ti tha pawlah kan tel thei zel hi staff te leh Line Department a kan thawhpui Department hrang hrang, Health Deptt, Ayush, UD&PA, Bank leh khawtlanga kan thawhpui NGO te min tawiawmna vang liau liau a ni tiin a sawi. Mizoram hi ram hrisel taka siamturin theihtawp chhuah tlang lehzual turin leh kan hmazawn a tihtur awmte ram leh hnam tan a ni tih hre thar leh a, theihtawp chhuah lehzual turin Dr.K.Beichhua hian he hun chhimtute a chah bawk a ni.

India ram pumah‘Rashtriya Poshan Maah’ hi Sepember thla chhung hman tur a ni a, a theme tur chu ‘Converging Towards a Healthy Walk Through Life’ tih niin,‘ Matru Vandana Saptah’ hi karkhat (1-7 Sept) chhunga hman tur a ni a, a theme hi ‘Mother Power, Nation Power’ a ni.

Poshan Abhiyaan in a thil tum bulpui ber chu naupang a chaklohna chi hrang hrang thleng thin heng thanthu, zang lutuk leh cher lutuk tih tlem bakah nu leh tleirawlah thisen tlakchham (anemia) tihhniam a ni. PMMVY in a tum ber chu Naupai/Naupawmte hriselna ngaihpawimawh niin, Anganwadi Centre-a inziahluh in fatir pai ten Rs.5000/- an dawngthei a ni.